ლევან გაჩეჩილაძე მზადაა, პირდაპირ ეთერში ღია დებატები გამართოს მიხეილ სააკაშვილთან ან ნინო ბურჯანაძესთან, ანუ იმ პოლიტიკოსებთან, ვინც 2008 წლის საპრეზიდენტო არჩევნების დროს სახელისუფლებო მხარეს წარმოადგენდა. ეს განცხადება "ქართული პარტიის" პოლიტიკურმა მდივანმა ეროსი კიწმარიშვილმა 13 დეკემბერს გამართულ პრესკონფერენციაზე გააკეთა, რომელიც, მისი განცხადებით, ზოგიერთ მედიასაშუალებაში პარტიისა და მისი ლიდერების წინააღმდეგ გაჩაღებულ ცილისმწამებლურ კამპანიას ეძღვნებოდა.
კიწმარიშვილის განცხადებით, 2008 წლის საპრეზიდენტო არჩევნების დასრულებიდან რამდენიმე დღეში დაიწყო "შავი პიარი" ლევან გაჩეჩილაძის წინააღმდეგ, რომელშიც მონაწილეობდნენ ქართული და უცხოური პიარჯგუფები.
"გაჩეჩილაძის წინააღმდეგ მიმართული კამპანია წარმოებდა სამი მიმართულებით. 1. ლევან გაჩეჩილაძე არის მძიმე ავადმყოფი, 2. "ქურდული ტრადიციების" მატარებელი და 3. შესულია გარიგებაში ხელისუფლებასთან", _ განაცხადა კიწმარიშვილმა და დასძინა, რომ ხელისუფლების დაკვეთით დღეს მიმდინარეობს ბინძური კამპანია "ქართული პარტიისა" და მისი ცალკეული ლიდერების წინააღმდეგ.
მან პრესკონფერენციაზე ჟურნალისტებს გააცნო სპეციალური განცხადება, რომელშიც ნათლადაა ახსნილი "ქართული პარტიის" და მისი ლიდერების წინააღმდეგ გაჩაღებული დეზინფორმაციული ომის მიზნები და ამოცანები".
"ხელისუფლებას ეშინია "ქართული პარტიისა", როგორც მისი რეალური ალტერნატივისა", - აცხადებს კიწმარიშვილი.
