"რუსეთის რეაქცია ნატოს გეგმებზე, რომლებიც ბალტიის ქვეყნების რუსეთის აგრესიისგან დაცვას ემსახურება ადეკვატური იქნება", _ განაცხადა რუსეთის თავდაცვის მინისტრმა ანატოლი სერდიუკოვმა ინტერნეტ-გვერდ "Wikileaks "-ის მიერ გამოქვეყნებული მასალის კომენტირებისას, რომლის მიხედვითაც "ნატოს მომზადებული აქვს გეგმა ბალტიის ქვეყნებისა და პოლონეთის რუსეთის შესაძლო აგრესიისგან დასაცავად".
"რუსეთი მიღებულ ზომებზე ადეკვატურად იმოქმედებს", _ აცხადებს სერდიუკოვი ტელეარხ "ვესტისათვის" მიცემულ ინტერვიუში და დასძენს, რომ მის დაქვემდებარებულ უწყებაში მაინც იმედოვნებენ, რომ ეს ინფორმაცია სინამდვილეს არ შეესაბამება, თუმცა მისივე განმარტებით, ასეთი ინფორმაცია მაინც არის შეშფოთების საგანი და რუსეთი იძულებული იქნება ადეკვატური ზომები მიიღოს.
ამას გარდა, რუსეთის თავდაცვის მინისტრი ასევე აღნიშნავს, რომ მოსკოვში იმედოვნებდნენ, რომ ამ ინფორმაციის გაჩენის შემდეგ ნატოს ხელმძღვანელობა მას ოფიციალურად უარყოფდნენ. მისივე ინფორმაციით, ამ პუბლიკაციის შემდეგ რუსეთის თავდაცვის სამინისტროში საფრთხეების შეფასება დაიწყეს, მათ შორის ანტისარაკეტო თავდაცვის სფეროში. ანატოლი სერდიუკოვი ასევე ხაზგასმით აღნიშნავს, რომ რუსეთის თავდაცვის სამინისტროში ამ პრობლემისადმი მიდგომა რეალისტურია და ილუზიებით არავინ იკვებება.
რუსეთის თავდაცვის მინისტრი ასევე აღნიშნავს, რომ 2008 წელს საქართველოსთან მომხდარი ომის შემდეგ არმიის ხელმძღვანელობის ყველა ილუზია გაქრა, და ამიტომაც გამოქვეყნებულ ახალ საფრთხეებს უწყებაში უდგებიან '"სწორხაზოვნად" და აუცილებლობის შემთხვევაში მათზე რეაგირებისათვის მზად არიან კიდეც.
შეგახსენებთ, რომ გასულ კვირას ბრიტანულმა გაზეთმა "The Guardian"-მა გამოაქვეყნა ინტერნეტ-გვერდ "Wikileaks "-ის მიერ მოპოვებული მასალა, იმის შესახებ, რომ 2009 წლის დეკემბერში ამერიკელი და გერმანიის ელჩები ნატოში ივო დაალდარი და ულრიხ ბრანდერბურგი ალიანსის გენერალურ მდივანს ანდრეს ფოგ რასმუსენსა და ბალტიისპირეთის ქვეყნების წარმომადგენლებს აცნობებდნენ, რომ მიღებულია გადაწყვეტილება პოლონეთის საგანგებო სამხედრო დაცვის გეგმის "Eagle Guardian"-ის გაფართოების შესახებ.
ამ გეგმის მიხედვით, რუსეთის მიერ ბალტიისპირეთზე შეიარაღებული თავდასხმის განხორციელების შემთხვევაში ნატო თავის ცხრა დივიზიას გამოიყენებს. პორტები გერმანიაში და პოლონეთს ჩრდილოეთით მიიღებენ საზღვაო ქვეითებს და ასევე ამერიკულ და ბრიტანულ სამხედრო გემებს. როგორც პუბლიკაციაში იყო ნათქვამი ნატოში აშშ-ს მუდმივმა წარმომადგენელმა ჯონ ხეფფერნმა, რასმუსენმა და ესტონეთის, ლატვიისა და ლიტვის წარმომადგენლებმა ეს გეგმა მოიწონეს.
რუსეთი ამ პუბლიკაციამ უკიდურესად აღაშფოთა. რუსეთის საგარეო საქმეთა მინისტრმა სერგეი ლავროვმა განაცხადა, რომ რუსეთი ნატოსგან აღნიშნული პუბლიკაციის გამო ახსნა-განმარტებებს ელის. ლავროვმა ეჭვი შეიტანა ნატოს გულწრფელობაში, ვინაიდან ლისაბონის სამიტზე ალიანსის გენმდივანი ირწმუნებოდა, რომ რუსეთი ნატოს მტერი არ არის.
ნატოს აღნიშნულთან დაკავშირებით ოფიციალური კომენტარი არ გაუკეთებია, თუმცა ბრიუსელში მოწყობილ პრესკონფერენციაზე ნატოს გენერალურმა მდივანმა ანდრეს ფოგ რასმუსენმა რუსი ჟურნალისტის კითხვაზე აღნიშნულთან დაკავშირებით კიდევ ერთხელ განაცხადა, რომ ალიანსი რუსეთში მტერს ვერ ხედავს. მან ასევე განაცხადა, რომ ნატოს პოლიტიკის თანახმად, ალიანსის ხელმძღვანელობა არ აკეთებს კომენტარს გაჟონილ საიდუმლო ინფორმაციაზე. ამით ანდრეს ფოგ რასმუსენმა არც დაადასტურა და არც უარყო ბალტიისპირეთისა და პოლონეთის დაცვის გეგმის არსებობა.
