საქართველოს განათლებისა და მეცნიერების მინისტრმა დიმიტრი შაშკინმა, საქართველოს პრეზიდენტის ინიციატივით, ჯუმბერ ლომინაძეს ბრწყინვალების ორდენი გადასცა.
მეცნიერს ორდენი ნაყოფიერი სამეცნიერო და საგანმანათლებლო მოღვაწეობისათვის გადაეცა.
ჯუმბერ ლონიძე გამოჩენილი ქართველი მეცნიერი, ასტროფიზიკოსი და საქართველოს მეცნიერებათა ეროვნული აკადემიის მათემატიკისა და ფიზიკის განყოფილების აკადემიკოსია.
ჯუმბერ ლომინაძე 250-მდე სამეცნიერო ნაშრომის ავტორია. მინიჭებული აქვს ვახტანგ გორგასლის III ხარისხის ორდენი, საქართველოს სახელმწიფო პრემია მეცნიერებისა და ტექნიკის დარგში. სხვადასხვა დროს იყო საქართველოს მეცნიერებათა აკადემიის ე.ხარაძის აბასთუმნის ნაციონალური ასტროფიზიკის ობსერვატორიის დირექტორი, ობსერვატორიის პლაზმური ასტროფიზიკის ცენტრის ხელმძღვანელი, საქართველოს კოსმოსური სააგენტოს თავმჯდომარე, იყო საქართველოს ცენტრალური საარჩევნო კომისიის თავმჯდომარე.