დედოფლისწყაროს რაიონში, ყოფილი მეფრინველეობის საწარმოს ტერიტორიაზე, ე.წ. შირაქის დასახლებაში მცხოვრებ 10 ოჯახს 20 წელია ელექტროენერგია არ მიეწოდება. ამის შესახებ "ჯი-ეიჩ-ენს" კახერთის საინფორმაციო ცემტრიდან აცნობეს.
ადგილობრივების თქმით, საცხოვრებელი შენობები იმდენად ავარიულია, რომ ქარის დროს შეიძლება დაინგრეს და შიგ მოყვნენ.
„20 წელი დენი და სასმელი წყალი რომ არ გვექნება, ამაზე დიდი პრობლემა რაღა გინდა. როცა საშუალება მაქვს, 4 ტონა წყალში 50 ლარს ვაძლევ. სახლები თავზე გვენგრევა. ქარის დროს, გვეშინია, რომ არ დაინგრეს და შიგ არ მოვყვეთ. დახმარება ბევრჯერ ვითხოვეთ, მაგრამ ყურადღებას არავინ გვაქცევს. თავს პენსიით ვირჩენთ. უწყლობის გამო მიწასაც ვერ ვამუშავებთ", - ამბობს 82 წლის თეკლე ლიქოკელი.
„სასმელადჭაბურღილის წყალს ვიყენებთ, 2 დღე უნდა, რომ დაილექოს. არავის არ ვახსოვართ, არც არჩევნებში ვჭირდებით მთავრობას, რამეს ტყუილად მაინც რომ დაგვპირდებოდნენ. 2 წლის წინ, რაიონის გამგებელთან ლევან ბაღაშვილთან მივედით და დენის გაყვანაში დახმარება ვთხოვეთ. იცით, რა გვიპასუხა, თქვენი გასახლება უფრო იაფი დამიჯდება, ვიდრე მანდ დენის გაყვანაო", - აღნიშნა ბესო ყაბანაშვილმა.
დედოფლისწყაროს მუნიციპალიტეტის საკრებულოს თავმჯდომარის ლევან ბაღაშვილის განცხადებით, შირაქის დასახლებას ოფიციალური სოფლის სტატუსი არ აქვს. „პრობლემები აღნუსხული გვაქვს, მაგრამ ამ ეტაპზე არაფერი არ იგეგმება. ელექტროენერგიას ჩვენ ვერ გავიყვანთ. არ გამოვრიცხავ, რომ სხვა
პრობლემების მოგვარების მიზნით, 2011 წლის ბიუჯეტის პროექტში რამე გავითვალისწინოთ", - განაცხადა ბაღაშვილმა.
