საბჭოთა რეჟიმის მიერ განხორციელებული პოლიტიკური რეპრესიების მსხვერპლთა და მათი ოჯახის წევრებისთვის ფულად კომპენსაციის ოდენობას სასამართლო განსაზღვრავს. აღნიშნულთან დაკავშირებით ცვლილება შედის "საქართველოს მოქალაქეთა პოლიტიკური რეპრესიების მსხვერპლად აღიარების და რეპრესიულთა სოციალური დაცვის შესახებ" კანონში.
კანონპროექტის თანახმად, ახალი რედაქციით ყალიბდება მე-9 მუხლი, რომლის მიხედვითაც პირი, რომელმაც რეპრესია განიცადა თავისუფლების აღკვეთის, გადასახლების, სპეციალური დასახლების ადგილას გამწესების, ფსიქიატრიულ დაწესებულებაში იძულებით მოთავსების სახით, ან გარდაიცვალა პოლიტიკური რეპრესიის შედეგად და აღიარებულია ამ რეპრესიების მსხვერპლად, აგრეთვე მისი პირველი რიგის მემკვიდრეს შეიძლება მიეცეს ფულადი კომპენსაცია, რომლის ოდენობასაც სასამართლო დაადგენს.
ამასთან, საკანონმდებლო ინიციატივა რეპრესირებული პირისთვის ან მისი პირველი რიგის მემკვიდრეობისთვის კომპენსაციას ითვალისწინებს, რომლის რაოდენობასაც ასევე სასამართლო, სავარაუდოდ საარქივო ჩანაწერების საფუძველზე დაადგენს.
კანონპროექტის ინიციატორები პარლამენტის წევრები კახაბერ ანჯაფარიძე, ზვიად კუკავა და ჩიორა თაქთაქიშვილი არიან.
