ეუთომ სამხრეთ ოსეთს ბოდიში ოფიციალურად უნდა მოუხადოს. აცხადებს სეპარატისტული სამხრეთ ოსეთის ე. წ. პარლამენტის ვიცე-სპიკერი იური ძიცოითი.
"ქვეყნების უმრავლესობა, რომლებიც ეუთოში შედიან, საქართველოს უჭერს მხარს რუსეთის წინააღმდეგ. დღეს ჩვენ ამ ორგანიზაციასთან არავითარი ურთიერთობა არ გვაქვს. იმ შემთხვევაში, თუკი მათ აქ მუშაობის გაგრძელება სურთ, სამხრეთ ოსეთს ბოდიში ოფიციალურად უნდა მოუხადონ. როგორც კი ეს გაკეთდება, დავფიქრდებით მათთან მუშაობის გაგრძელებაზე", _ აცხადებს ძიცოითი.
მისი თქმით, საქართველოს მხარდაჭერა ეუთოს ზოგი წევრი სახელმწიფოს მიერ საერთაშორისო სამართლის დარღვევაა და აქ არ არს ჯანსაღი აზრი.
"რაც შეეხება საქართველოს ე. წ. ტერიტორიულ მთლიანობას, მინდა რუსეთის საგარეო საქმეთა მინისტრ სერგეი ლავროვის სიტყვებით გავიმეორო, რომ იმ საზღვრებში, რა საზღვრებშიც არსებობდა საქართველო 2008 წლის აგვისტომდე, უკვე ვეღარ იარსებებს. ორი ახალი ქვეყანა - აფხაზეთი და სამხრეთ ოსეთი - უკვე აღიარებულია და უკან დასახევი გზა არ არსებობს. მეტიც, საქართველოშიც კარგად ესმით უკვე, რომ აფხაზეთი და სამხრეთ ოსეთი აღიარებული სახელმწიფოები არიან", _ აცხადებს ძიცოითი.
