დივერსიული აქტების შესახებ გამოძიებაში რუსული მხარის პოზიცია ნათელს გახდის, რამდენადაა დაინტერესებული რუსეთის ფედერაცია, რომ ტერაქტებში მისი სტრუქტურების მონაწილეობა გამოირიცხოს. ამის შესახებ "ქრისტიან-დემოკრატების" ლიდერმა გიორგი თარგამაძემ შსს-ის მიერ სექტემბერ-ნოემბერში დივერსიული აქტების მოწყობაში ეჭვმიტანილების დაკავების შეფასებისას აღნიშნა.
მისი შეფასებით, დივერსიების აბსოლუტური პრევენცია გამორიცხულია ძლიერი სპეცსამასახურების მქონე ქვეყნებშიც კი, თუმცა ამჯერად მთავრია, რომ ქართველმა სამართლადმცველებმა ტერორისტული აქტების ორგანიზატორებიც და შემსრულებლებიც გამოავლინეს.
"ვფიქრობ, საგამოძიებო მუშაობა უნდა გაგრძელდეს ძირითადი მოტივის გამოსააშკარავებლად. ეს იყო ნაკარნახევი ქვეყანაში საზოგადოებრივი განწყობისა თუ ზოგადი პოლიტიკური ფონის დესტაბილიზაციისთვის, თუ დაგეგმილი იყო კონკრეტული ფიგურების განადგურებაც", - აღნიშნა თარგამაძემ და დასძინა, რომ როგორც განხორციელებულ, ისე განსახორციელებელ დივერსიულ აქტებს, შესაძლოა, უფრო დიდი მსხვერპლი მოჰყოლოდა.
რაც შეეხება ქართული მხარის მიერ რუსი სამართალდამცველებისთვის საგამოძიებო პროცესში თანამშრომლობის შეთავაზებას, დეპუტატის შეფასებით, რუსული მხარის პოზიციის გაჟღერების შემდეგ ნათელი გახდება, რამდენადაა დაინტერესებული რუსეთის ფედერაცია, რომ დივერსიული აქტების ორგანიზებაში მისი ოფიციალური სტრუქტურების თანამონაწილეობა გამორიცხოს.
თარგამაძის შეფასებით, კონფლიქტურ ზონებში შავი ხვრელების არსებობის გამო ქართულ სახელმწიფოში ხშირად ხდება დივერსიული აქტივობის ორგანიზება, ამიტომ ქართული მხარის სურვილი ამ ტერიტორიების საერთაშორისო მონიტორინგის შესახებ უფრო აქტუალური ხდება.
თუმცა, უმცირესობის ლიდერის თქმით, ვერანაირი საერთაშორისო მონიტორინგი ვერ უზრუნველყოფს ასეთი აქტების მზადების პრევენციას, ეს ზოგადად ფონს გააჯანსაღებს.
