საქართველოს ოკუპირებულ ტერიტორიებზე არსებული კულტურული მემკვიდრეობის ძეგლების შესახებ ალბომი გამოიცემა.
კულტურისა და ძეგლთა დაცვის სამინისტროს ინფორმაციით, აღნიშნულთან დაკავშირებით საჭირო თანხა მომავალი წლის ბიუჯეტში უკვე გათვალისწინებულია და ალბომი, სავარაუდოდ, 2011 წლის პირველი ნახევარში უკვე მზად იქნება.
როგორც ტერიტორიული მთლიანობის აღდგენის დროებითი კომისიის თავმჯდომარემ შოთა მალაშხიამ აღნიშნა, ოკუპირებულ ტერიტორიებზე არსებული კულტურული მემკვიდრეობის შესახებ ალბომში ძეგლების რაოდენობის, წარმოშობის, კუთვნილების, მდგომარეობის შესახებ რამდენიმე ენაზე უნდა იყოს დაწერილი და საერთაშორისო ორგანიზაციებს უნდა დაურიგდეს.
კულტურის სამინისტროს ინფორმაციით, ამ დროისთვის აფხაზეთისა და ცხინვალის რეგიონში, დაუზუსტებელი ინფორმაციით, 518 ძეგლია, თუმცა მათი მდგომარეობის შესახებ ქართულ მხარეს კონკრეტული მასალა არ აქვს. ამ მხრივ, სამინისტროს წარმომადგენლის ინფორმაციით, განსაკუთრებით სავალალო მდგომარეობა ცხინვალის რეგიონშია.
საგარეო საქმეთა სამინისტროს ინიციატივით, სამომავლოდ იგეგმება ჯგუფის შექმნა, რომელიც ოკუპირებულ ტერიტორიებზე არსებული მოძრავი კულტურული მემკვიდრეობის ნუსხას შედგენს, რომელიც ინტერპოლს გადაეცემა, რომ კანონგარეშე მათი საზღვრებს გარეთ გატანა და სავაჭრო ბირჟებზე გაყიდვა არ მოხდეს.
