ექსპერტი მამუკა არეშიძე რუსეთის "ეფ-ეს-ბეს" მიერ საქართველოში ტერაქტების მოწყობის სამ სავარაუდო ვერსიაზე საუბრობს.
"არსებობს შეკითხვა, რატომ იყო საქართველოს ტერიტორიაზე განხორციელებული ყველა ტერაქტი ნაკლებეფექტური? მე შემიძლია სამ ვერსიაზე ვიფიქრო: პირველი, ეს იყო გამაფრთხილებელი აფეთქებები. რუსეთი გვეუბნება, რომ შეუძლია მეტის გაკეთება, ანუ "სახლში თვითონ არის უფროსი". მეორე მიზეზად შეიძლება ის განვიხილოთ, რომ ტერაქტის შემსრულებლები არაპროფესიონალები იყვნენ და შეშინდნენ. რაც შეეხება მესამე მიზეზს, არ არის გამორიცხული, რომ რუსეთი უფრო მასშტაბური ტერაქტისთვის ემზადებოდეს, ამ აფეთქებებით კი მის გადაფარვას შეეცადა", - განუცხადა არეშიძემ "ჯი-ეიჩ-ენს" საქართველოს შინაგან საქმეთა სამინისტროს მიერ აფეთქებების სერიის საქმის გახსნაზე კომენტირებისას.
ამასთან, მისივე განმარტებით, გასაკვირი არ არის ის, რომ აფეთქებების შემსრულებლებად რუსეთის თავდაცვის სამინისტროს მაიორმა სწორედ გალის მაცხოვრებლები გამოიყენა.
"ის, რომ საუკუპაციო რეჟიმი იყენებს ოკუპირებული ტერიტორიების მაცხოვრებლებს და სხვადასხვა მეთოდით: შანტაჟით, მოსყიდვით, ეს ისტორიული ფაქტია. ჩემთვის ისიც ცნობილი იყო, რომ აფხაზეთში, სოფელ ილორის მიმდებარე ტერიტორიაზე სპეციალური ცენტრია შექმნილი იდეოლოგიური დივერსიებისთვის, რომლის მიზანსაც გალელების დანარჩენ საქართველოსთან მოწყვეტა წარმოადგენს. როგორც ჩანს, ეს ცენტრი გარკვეულ შედეგს აღწევს", - დასძინა არეშიძემ.
შეგახსენებთ, რომ საქართველოში სექტემბერ-ნოემრის თვეში განხორციელებული აფეთქებები გახსნილია. შინაგან საქმეთა სამინისტროს თანამშრომლებმა აფეთქებების სერიის ორგანიზებაში, შესრულებასა და ხელშეწყობაში ეჭვმიტანილი პირები დააკავეს. ოფიციალურად დადასტურებულია, რომ აფეთქებების დამკვეთი და ორგანიზატორი რუსეთის თავდაცვის სამინისტროს გენერალი ევგენი ბორისოვი იყო.
