ექსპერტ ვასილ კაჭარავას შეფასებით, რუსეთი "ჩხიკვთა ქორწილში" ყვავის მდგომარეობაშია.
"მნიშვნელოვანია, რომ ევროკავშირ-რუსეთის სამიტი ასტანის შეხვედრის შემდეგ იმართება, სადაც რუსეთი აღმოჩნდა ყვავის მდგომარეობაში "ჩხიკვთა ქორწილში". მას ყველა მიუთითებდა, რომ უნდა დაეცვა ქორწილის წესები, თუმცა ის არანაირ სტანდრატებს არ ექვემდებარებოდა. არავის არ უნდა თავისი ქვეყნის ხელმძღვანელობა ისეთი გამასხარავებული ნახოს, როგორც რუსეთი ასტანაში, მაგრამ, ვფიქრობ, ყვავობის შლეიფი ბატონ მედვედებს დღეს ბრიუსელშიც ჩაყვება", - აცხადებს კაჭარავა ბრიუსელში დაგეგმილ ევროკავშირ-რუსეთის სამიტზე კომენტირებისას.
მისივე შეფასებით, იმ კონტექსტში, რომ "რუსეთი ძალიან სწორხაზოვანია, არ უნდა ველოდოთ რომ ყველაფერი დღეს და ხვალ გადაწყდება, მაგრამ იმედი უნდა ვიქონიოთ, რომ თუ ყვავის როლში ყოფნა რუსეთის პრეზიდენტს და საგარეო საქმეთა მინისტრს არ სცხვენია, რუს საზოგაოდებას მაინც შერცხვება".
შეგახსენებთ, რომ დღეს, ბრიუსელში ევროკავშირ-რუსეთის სამიტი გაიმართება. ამ მიზნით დიმიტრი მედვედევი ბელგიის დედაქალაქში უკვე ჩავიდა.
