ლაგოდეხის რაიონის სოფელ ჭაბუკიანის მაცხოვრებლებმა საპროტესტო აქცია გამართეს და რამდენიმე წუთით ლაგოდეხი - გურჯაანის ავტომაგისტრალი გადაკეტეს. აქციის მონაწილეები სატყეო სააგენტოს მიერ დაწესებულ შეზღუდვებს აპროტესტებენ, რომლის საფუძველზეც, მათი თქმით, რეინჯერები ტყიდან შეშის გატანის უფლებას არ აძლევენ.
„ზამთარი მოვიდა, აცივდა და ტყიდან შეშა ვერ გამოგვაქვს. რეინჯერები ხის მოჭრას გვიკრძალავენ, ძირნაყარი შეშა კიდევ აღარ არის", - აღნიშნეს აქციის მონაწილეებმა.
ჭაბუკიანის მაცხოვრებლებს ლაგოდეხის მუნიციპალიტეტის გამგებელი დიმიტრი ლოლაძე შეხვდა. გამგებლის თქმით, სატყეო სააგენტოს ადგილობრივმა სამსახურმა მოსახლეობის შეშით მომარაგებისათვის დამატებითი რესურსი გამოყო, რომლის აღრიცხვაც უკვე დაიწყო. „მოსახლეობას ტყიდან შეშის გატანა პარასკევიდან შეეძლება. ზოგიერთი ჯიშის ხის მოჭრა კი კანონით აკრძალულია", - აღნიშნა ლოლაძემ.
სოფელ ჭაბუკიანში 293 ოჯახი ცხოვრობს. სოფელი გაზიფიცირებული არ არის.
