საქართველოს პრეზიდენტმა ტერაქტების გახსნის საქმეზე მომუშავე სამართალდამცველებს "ოპერატიული რეაგირებისთვის" მადლობა გადაუხადა. ქვეყნის პირველმა პირმა აღნიშნულის შესახებ კომენტარი მექსიკაში გამგავრებამდე გააკეთა.
მისი თქმით, საქართველომ, აღმოჩენილი მასალების მიხედვით, სერიოზული ტერაქტების აქტები აიცილა თავიდან.
"საქართველოს პოლიციის მიერ დაკავებულ იქნა ძალიან საშიშ დანაშულის ჩადენაში ეჭვმიტანილთა ჯგუფი, რომელთაც ბრალი ედებათ რამდენიმე საშიში აფეთქების აქტის განხორციელებაში. კერძოდ, აფეთქებები საქართველოს რკინიგზაზე, ამერიკის საელჩოს მიმდებარე ტერიტორიაზე და სულ ცოტა ხნის წინ განხორციელებული აფეთქება ერთ-ერთ პოლიტიკურ პარტიასთან, რომელსაც ადამიანის მსხვერპლი მოყვა. ყველა ნიშანი რომელიც ჯერჯერობით სამართალდამცავებს აქვთ ხელთ, მიუთითებს იმაზე რომ ეს პირები მოქმედებდნენ ოკუპირებული ტერიტორიიდან", - განაცხადა სააკაშვილმა ბათუმის აეროპორტში.
პრეზიდენტმა სამართალდამცველ ორგანოებს მუშაობის უფრო მეტად გაძლიერებისკენ მოუწოდა.
შეგახსენებთ, რომ საქართველოში სექტემბერ-ნოემრის თვეში განხორციელებული აფეთქებები გახსნილია. შინაგან საქმეთა სამინისტროს თანამშრომლებმა აფეთქებების სერიის ორგანიზებაში, შესრულებასა და ხელშეწყობაში ეჭვმიტანილი პირები დააკავეს. ოფიციალურად დადასტურებულია, რომ აფეთქებების დამკვეთი და ორგანიზატორი რუსეთის თავდაცვის სამინისტროს გენერალი ევგენი ბორისოვი იყო.
დაკავებულები არიან გოგიტა არქანია (აფეთქებების შემსრულებელი, ყოფილი სამხედრო მოსამსახურე), ჯონი აბულაძე (თანამონაწილე, ასაფეთქებელი ნივთიერებების შემნახველი და გადამზიდავი), მარიამ ნიკოლავა (თანამონაწილე, ასაფეთქებელი ნივთიერებების შემნახველი და გადამზიდავი), გოჩა ხურცილავა (თანამონაწილე, ასრულებდა მძღოლის ფუნქციას), გოდერძი არქანია (თანამონაწილე) და ლელა ხურცილავა (თანამონაწილე).
ამავდროულად, იძებნებიან ამჟამად ოკუპირებულ გალის რაიონში მყოფი: მერაბ ყოლბაია, მეტსახელად '"კოჭოია" (აფეთქებების ორგანიზატორი და შემსრულებელი) და მუხრან ცხადაია (აფეთქებების ორგანიზატორი და შემსრულებელი -2003 წლიდან იძებნება ადამიანის გატაცებისათვის).
აღსანიშნავია, რომ შინაგან საქმეთა სამინისტრომ არქანიასა და ყოლბაიას თანამზრახველის ჯონი აბულაძის სახლში აღმოაჩინა: 13 ერთეული ასაფეთქებელი მოწყობილობა, მათ შორის: ჰექსოგენით სავსე 9 ქილა, რომელთაგანაც 4 ქილაში ლურსმნები იყო გარეული, ხოლო 1 ქილაში _ ტყვიის გულები. სულ ამოღებულია 10 კგ. ასაფეთქებელი ნივთიერება ჰექსოგენი.
როგორც ცნობილია, სექტემბერ-ნოემბრის თვეში აფეთქებები მოხდა თბილისში, ჯავახიშვილის ქუჩის #88-ში მდებარე "ლეიბორისტული პარტიის~ ცენტრალურ ოფისთან, რის შედეგადაც დაიღუპა ადგილობრივი მცხოვრები ნინო გორდეზიანი, მუხიანის პირველ მიკრორაიონში, ნონეშვილის ქუჩის #13-ში მდებარე სუპერმარკეტთან, თბილისში, აშშ-ის საელჩოს სიახლოვეს, ასევე ორი აფეთქება განხორციელდა თბილისის რკინიგზის სადგურთან და ხობის რაიონის სოფ. ჭალადიდთან სარკინიგზო ხიდზე.
