სამართალდამცველების მიერ ამოღებული ბომბების ნაწილი კონკრეტული ადამიანების წინააღმდეგ უნდა ამოქმედებულიყო, _ ამის შესახებ მერაბიშვილმა ჟურნალისტებს შსს-ის მიერ საქართველოში სექტემბერ-ნოემბერში მომხდარი აფეთქებების საქმის გახსნაზე კომენტირებისას განუცხადა.
"ეს იყო თბილისისა და სამეგრელო-ზემო სვანეთის კონტრდაზვერვისა და კონტრტერორისტული სამსახურების ერთობლივი ღონისძიება. ეს იყო ძალიან სერიოზული ღონისძიება. ჩვენ თავიდან ავიცილეთ სერიოზული საფრთხე, რადგან აღმოჩენილი ბომბებიდან ნაწილი კონკრეტული ადამიანების წინააღმდეგ უნდა ამოქმედებულიყო", - აცხადებს მერაბიშვილი.
ამასთან, შს მინისტრმა საქმის გახსნაზე მომუშავე თითოეულ ოპერატიულ თანამშრომელს, "რამდენიმეთვიანი დაძაბული მუშაობისთვის" მადლობა გადაუხადა.
"კიდევ ერთხელ ვიმეორებ, რომ ჩვენ სერიოზული საფრთხე ავიცილეთ თავიდან და მიხარია, რომ ჩვენს მოქალაქეებს ასეთი ტიპის დანაშაულებრივი ჯფუფების მხრიდან უკვე ნაკლები საფრთხე ემუქრება", - დასძინა საქართველოს შინაგან საქმეთა მინისტრმა.
შეგახსენებთ, რომ საქართველოში სექტემბერ-ნოემრის თვეში განხორციელებული აფეთქებები გახსნილია. შინაგან საქმეთა სამინისტროს თანამშრომლებმა აფეთქებების სერიის ორგანიზებაში, შესრულებასა და ხელშეწყობაში ეჭვმიტანილი პირები დააკავეს. ოფიციალურად დადასტურებულია, რომ აფეთქებების დამკვეთი და ორგანიზატორი რუსეთის თავდაცვის სამინისტროს გენერალი ევგენი ბორისოვი იყო.
დაკავებულები არიან გოგიტა არქანია (აფეთქებების შემსრულებელი, ყოფილი სამხედრო მოსამსახურე), ჯონი აბულაძე (თანამონაწილე, ასაფეთქებელი ნივთიერებების შემნახველი და გადამზიდავი), მარიამ ნიკოლავა (თანამონაწილე, ასაფეთქებელი ნივთიერებების შემნახველი და გადამზიდავი), გოჩა ხურცილავა (თანამონაწილე, ასრულებდა მძღოლის ფუნქციას), გოდერძი არქანია (თანამონაწილე) და ლელა ხურცილავა (თანამონაწილე).
ამავდროულად, იძებნებიან ამჟამად ოკუპირებულ გალის რაიონში მყოფი: მერაბ ყოლბაია, მეტსახელად '"კოჭოია" (აფეთქებების ორგანიზატორი და შემსრულებელი) და მუხრან ცხადაია (აფეთქებების ორგანიზატორი და შემსრულებელი -2003 წლიდან იძებნება ადამიანის გატაცებისათვის).
აღსანიშნავია, რომ შინაგან საქმეთა სამინისტრომ არქანიასა და ყოლბაიას თანამზრახველის ჯონი აბულაძის სახლში აღმოაჩინა: 13 ერთეული ასაფეთქებელი მოწყობილობა, მათ შორის: ჰექსოგენით სავსე 9 ქილა, რომელთაგანაც 4 ქილაში ლურსმნები იყო გარეული, ხოლო 1 ქილაში _ ტყვიის გულები. სულ ამოღებულია 10 კგ. ასაფეთქებელი ნივთიერება ჰექსოგენი.
როგორც ცნობილია, სექტემბერ-ნოემბრის თვეში აფეთქებები მოხდა თბილისში, ჯავახიშვილის ქუჩის #88-ში მდებარე "ლეიბორისტული პარტიის~ ცენტრალურ ოფისთან, რის შედეგადაც დაიღუპა ადგილობრივი მცხოვრები ნინო გორდეზიანი, მუხიანის პირველ მიკრორაიონში, ნონეშვილის ქუჩის #13-ში მდებარე სუპერმარკეტთან, თბილისში, აშშ-ის საელჩოს სიახლოვეს, ასევე ორი აფეთქება განხორციელდა თბილისის რკინიგზის სადგურთან და ხობის რაიონის სოფ. ჭალადიდთან სარკინიგზო ხიდზე.
