კავკასიის გარემოსდაცვითი არასამთავრობო ორგანიზაციების ქსელმა (CENN) კახეთის რეგიონში მიწის რესურსებისა და სოფლის მეურნეობის კუთხით არსებული პრობლემების შესასწავლად კვლევა ჩაატარა. კვლევის შედეგად გამოვლინდა, რომ ძირითადი პრობლემები მიწის ეროზია, ტყეების გაჩეხვა, სათესლე მასალისა და ტექნიკის დეფიციტი, ასევე ნიადაგის მასობრივი დაჭაობებაა.
კვლევის მიხედვით, თითქმის ყველა სოფელში მოშლილია სარწყავი და სადრენაჟო სისტემები, ზოგან სასმელი წყალიც კი არ არის.
ასოციაცია CENN -ის ინფორმაციით, ერთ - ერთი ძირიდადი პრობლემა, რომელიც კვლევის შედეგად გამოიკვეთა ნიადაგის დაჭაობებაა, რაც მოსახლეობას მოსავლის მოყვანის საშუალებას არ აძლევს. სოფლებში არ არსებობს ან მწყობრიდან გამოსულია სადრენაჟო სისტემები, რის გამოც ხშირად მოსახლეობას დატბორილ სახლებში უწევს ცხოვრება. ზოგ სოფელში დრენაჟები არის, მაგრამ რეაბილიტაციას საჭიროებს.
დედოფლისწყაროს მუნიციპალიტეტის ყველაზე სერიოზული პრობლემა სარწყავი წყლის არარსებობაა. სოფლები ფიროსმანი, ქვემო ქედი, სამთაწყარო სარწყავი სისტემების აღდგენას საჭიროებენ. ამასთან, ყველგან ჩასატარებელია ნაპირსამაგრი სამუშაოები. სარწყავი სისტემა აღსადგენია სოფელ საბათლოშიც.
კიდევ ერთი საჭირბოროტო საკითხი ადიდებული მდინარეებია. CENN -ის ცნობით, იმის გამო, რომ მდინარეების კალაპოტები გაწმენდილი არ არის და არც ნაპირებია გამაგრებული, მდინარის ყოველ ადიდებას სერიოზული ზიანი მოაქვს - ტბორავს ნაკვეთებსა და სავარგულებს. განსაკუთრებული პრობლემა საზღვრისპირა რეგიონებშია, სადაც მდინარის კალაპოტის შეცვლის გამო ტერიტორიები იკარგება.
აღნიშნული კვლევა რეგიონული პროექტის „მიწის რესურსების მდგრადი მართვა, მიწის დეგრადაციის შემცირებისა და სიღარიბის დაძლევისათვის სამხრეთ კავკასიის რეგიონში" ფარგლებში ჩატარდა.
