"ვარდების რევოლუციის" შემდეგ საქართველოში განხორციელებულ რეფორმებზე, ქვეყნის ევროინტეგრაციის საკითხზე, რუსეთთან ურთიერთობებსა და ამ კონტექსტში ოკუპირებულ ტერიტორიებზე, ასევე პრეზიდენტ სააკაშვილის სამშვიდობო ინიციატივაზე ჟურნალისტმა დეივიდ ფროსტმა, გადაცემაში "ფროსტი მსოფლიოს გარშემო" საქართველოს ვიცე-პრემიერ მინისტრ გიორგი ბარამიძესთან ისაუბრა.

"ჩვენ ყოველთვის გვქონდა პრობლემა რუსეთთან, რადგან მისთვის დიდი პრობლემაა დამოუკიდებელი, ევროპული საქართველოს არსებობა. რუსეთში დღემდე ოცნებობენ საბჭოთა კავშირის აღდგენაზე და გავლენის სფეროების გაფართოებაზე. პუტინმა თავად განაცხადა, რომ საბჭოთა კავშირის დაშლა მე-20 საუკუნის ყველაზე დიდი გეოპოლიტიკური ტრაგედია იყო. რუსეთს აქვს დიდი პრობლემა გააცნობიეროს და შეეგუოს საქართველოს, როგორც ევროპულ სახელმწიფოს, მაგრამ მას ამის გაკეთება მაინც მოუწევს", - განაცხადა ბარამიძემ რუსეთთან ურთიერთობებზე საუბრისას.

ამასთან, მისი განმარტებით, საქართველოს მშვიდობა და მოსკოვთან ნორმალური, კონსტრუქციული ურთიერთობა სურს, "რადგან ჩვენ ბევრი საერთო ინტერესი გვაქვს".

"სწორედ ამისთვის საჭიროა დიალოგი. ურთიერთობების ნორმალიზაცია საქართველოს ტერიტორიული მთლიანობისა და სუვერენიტეტის პატივისცემაზე უნდა იყოს დაფუძნებული. ამ კუთხით რუსეთმა საქართველოს ტერიტორიიდან საკუთარი ჯარები უნდა გაიყვანოს და ეთიკური წმენდის მსხვერპლთა უფლებებს პატივი სცეს", - განმარტა ბარამიძემ.

რაც შეეხება საქართველოს ნატოსა და ევროსტრუქტურებში ინტეგრაციის საკითხს, ქვეყნის ვიცე-პრემიერმა განმარტა, რომ ნატო რუსეთთან სტრატეგიულ პარტნიორობას საქართველოს ინტერესების ხარჯზე არ აპირებს.

"ნატოს სამიტზე მიღებულ ყველა დოკუმენტში ხაზგასმითაა აღნიშნული, რომ საქართველო გახდება ნატოს წევრი, რომ ალიანსის წევრი ქვეყნები მხარს უჭერენ საქართველოს ტერიტორიულ მთლიანობას და სუვერენიტეტს და რომ ორგანიზაციის წევრი სახელმწიფოები რუსეთს "ცეცხლის შეწყვეტას" და დეოკუპაციას სთხოვს", - დასძინა საქართველოს ვიცე-პრემიერმა "ალ ჯაზირასთან" საუბარში.