"ქრისტიან-დემოკრატიული მოძრაობა" 2011 წლის ბიუჯეტის პროექტს აკრიტიკებს.
"სამწუხაროდ, ჩვენი მოლოდინი ახდა. პრაქტიკულად, ყველა ძირითადი პროგრამის დაფინანსება რამდენჯერმეა შემცირებული, ზოგი კი მთლიანად გაუქმებულია. ქვეყანაში აღარ იარსებებს რეფერალური პროგრამა, რომელიც მიმდინარე წელთან შედარებით 3-ჯერაა შემცირებული. ეს ნიშნავს, რომ ათობით ათასი ჩვენი ხელმოკლე მოქალაქე ვერ იმკურნალებს და ვეღარ გაიკეთებს სასიცოცხლოდ აუცილებელ ოპერაციას. 73 მილიონითაა შემცირებული სოციალური დახმარებების დაფინანსება და ბიუჯეტის წინა ვარიანტთან შედარებით, 79 მილიონით მცირდება სახელმწიფო დაზღვევისთვის გათვალისწინებული თანხებიც. მთავრობა უარს ამბობს პრეზიდენტის მიერ ზარზეიმით გამოცხადებულ იაფი დაზღვევის პროგრამაზე", - განაცხადა გიორგი ახვლედიანმა საგანგებო ბრიფინგზე.
ფრაქცია "ქრისტიან-დემოკრატების" თავმჯდომარის შეფასებით, ბიუჯეტის პროექტი არათუ მხარდაჭერას, განხილვასაც არ იმსახურებს. გიორგი თარგამაძის პოლიტიკური გუნდი საპარლამენტო უმრავლესობას ბიუჯეტის ჩაგდებისკენ მოუწოდებს, მთავრობას კი ურჩევს მთავარი ფინანსური დოკუმენტი ქვეყანაში არსებული რეალობის ადეკვატური გახადოს.
