გერმანული ავიაკომპანია Lufthansa-ს მფრინავებმა პარასკევს, 2 სექტემბერს, ერთდღიანი გაფიცვა დაიწყეს.
მფრინავთა პროფკავშირის Vereinigung Cockpit-ის განცხადებით, გაფიცვა გამოიწვევს 800 ფრენის გაუქმებას, რომელსაც ახორციელებს Lufthansa და Lufthansa Cargo.
გაფიცვა შეეხება 130 ათასამდე მგზავრს, როგორც შიდა, ისე საერთაშორისო მარშრუტებზე. ამასთან, იუწყებიან, რომ არ არის გამორიცხული, ზოგიერთ შემთხვევაში, გაუქმდეს ან გადაიდოს 3 და 4 სექტემბრის რეისები.
Lufthansa-ს მფრინავები ხელფასების გაზრდას ითხოვენ. 1-ელ სექტემბერს პროფკავშირი აცხადებდა, რომ გაფიცვის თავიდან ასაცილებლად, კომპანიამ "უკეთესი პირობები უნდა შესთავაზოს მფრინავებს".
პროფკავშირი ითხოვს, ავიაკომპანიამ 5.5%-ით გაუზარდოს ხელფასი წელსვე 5 ათას კაპიტანსა და პირველ პილოტს. ამასთან, ხელფასი ავტომატურად მიაბას ინფლაციის მაჩვენებელს.
Lufthansa-მ ამ მოთხოვნებს გადაჭარბებული უწოდა და აღნიშნა, რომ მათი დაკმაყოფილების შემთხვევაში კომპანიის სახელფასო და პერსონალის ხარჯები მომდევნო ორ წელიწადში 40 პროცენტზე მეტით, ანუ 900 მილიონი ევროთ გაიზრდება, რაც, როგორც აღინიშნა, "აბსოლუტურად მიუღებელია".
ავიაკომპანიის განცხადებით, პროფკავშირს შესთავაზა "კარგი და სოციალურად დაბალანსებული პაკეტი" და მოუწოდა პროფკავშირის ხელმძღვანელობას მოლაპარაკების მაგიდასთან დაბრუნებისკენ.