პოლონეთი მეორე მსოფლიო ომში გერმანიის მიერ მიყენებულ ზიანს 6.2 ტრილიონ ზლოტად (1.5 ტრილიონი დოლარი) აფასებს. ამის შესახებ მმართველი პარტიის "კანონი და სამართლიანობის" ლიდერმა იაროსლავ კაჩინსკიმ განაცხადა
1-ელ სექტემბერს, ვარშავაში, მეორე მსოფლიო ომის დაწყებიდან 83-ე წლისთავზე წარადგინეს ანგარიში მეორე მსოფლიო ომში ნაცისტური გერმანიის აგრესიის შედეგად მიყენებული ზიანის თაობაზე.
"საქმე იმაშია, რომ, შესაძლოა, გრძელი და რთული სამართლებრივი პროცესის შედეგად, მივიღოთ კომპენსაცია ყველაფრისთვის, რაც გერმანიამ, გერმანიის სახელმწიფომ და გერმანელმა ხალხმა გაუკეთეს პოლონეთს 1939-1945 წლებში", - თქვა კაჩინსკიმ.
ანგარიშის პრეზენტაციას პრემიერ-მინისტრი მატეუშ მორავიეცკი, სეიმის სპიკერი ელჟბიეტა ვიტეკი, ასევე მთავრობის წევრები დაესწრნენ.
კაჩინსკიმ ასევე განაცხადა, რომ გერმანიას სრულად არ უგია პასუხი პოლონეთის წინააღმდეგ ჩადენილი დანაშაულებისთვის.
"მსოფლიოს ათობით ქვეყანამ, რა თქმა უნდა, სხვადასხვა ხარისხით მიიღო კომპენსაცია გერმანიისგან. მეორე მხრივ, პოლონეთმა ამას ვერ მიაღწია", - დასძინა მან.
პოლონეთმა არაერთხელ წამოჭრა გერმანიასთან დიალოგში რეპარაციების საკითხი. ბერლინი მიიჩნევს, რომ რეპარაციების საკითხი დახურულია.
მეორე მსოფლიო ომის დროს გერმანიის აგრესიისა და ოკუპაციის შედეგად პოლონეთისთვის მიყენებული ზარალის შესახებ მოხსენება მოიცავს სამ ტომს. პირველ ტომში საუბარია გაწეულ სამუშაოზე, რომელიც ჩატარდა ზიანის შესაფასებლად, დანარჩენი ორი მოიცავს ინფორმაციას ნაცისტური გერმანიის მიერ 1939-1944 წლებში ჩადენილი დანაშაულების შესახებ. ტომეულში ასევე წარმოდგენილია ფოტომასალა, რომელიც ასახავს პოლონეთის მოქალაქეთა წინააღმდეგ ჩადენილ დანაშაულებს.
მოხსენების თანახმად მიყენებული ზიანი შეადგენს 6 ტრილიონ 220 მილიარდ 609 მილიონ ზლოტს, რაც დაახლოებით 1 ტრილიონ 532 მილიარდ 170 მილიონი აშშ დოლარია.
მოხსენების ავტორების თქმით, პოლონეთის პრეტენზიებს გერმანიის მიმართ ვადა არ გასვლია და არ აქვს ხანდაზმულობა.
მეორე მსოფლიო ომი 1939 წლის 1 სექტემბერს ნაცისტური გერმანიის მიერ პოლონეთში შეჭრით დაიწყო.
