საქართველოს ტერიტორიულ მთლიანობაზე ადრინდელ საზღვრებში საუბარიც ზედმეტია. ეს განცხადება რუსეთის საგარეო საქმეთა მინისტრმა სერგეი ლავროვმა გააკეთა.
რუსეთის საგარეო საქმეთა სამინისტროს მიერ გავრცელებული ინფორმაციით, რუსეთის საგარეო საქმეთა მინისტრმა უკმაყოფილება გამოთქვა, იმის გამო, რომ - "დასავლური დელეგაციების რიგი ხელმძღვანელების სიტყვით გამოსვლებში "საქართველოში არსებული" კონფლიქტების თემა ისმოდა თან, ისეთი კონტექსტით, თითქოს აფხაზეთი და სამხრეთ ოსეთი საქართველოს სახელმწიფოს ტერიტორიის ფარგლებში რჩებიან".
"სიტუაცია რომელიც წარმოიქმნა არის საქართველოს შეიარაღებული ძალების მიერ 2008 წლის აგვისტოში სამხრეთ ოსეთზე ვერაგული თავდასხმის შედეგი. ეს არაფრით პროვოცირებული თავდასხმაა. თავდასხმაა, რომელიც განხორციელდა საქართველოს მიერ ყველა საერთაშორისო ნორმის, ჰელსინკის შემაჯამებელი აქტისა და ეუთოს სხვა დოკუმენტების, მათ შორის ქართულ-ოსური კონფლიქტის მოგვარების შესახებ დოკუმენტების დარღვევით", _ აცხადებს სერგეი ლავროვი.
მისივე თქმით, რუსეთი იძულებული იყო ამ "არაფრით პროვოცირებული" თავდასხმისათვის პასუხი გაეცა და ამ "პასუხის" ერთადერთი მიზანი ცხინვალის მოსახლეობისა და რუსი სამშვიდობოების სიცოცხლის დაცვა იყო.
"რუსეთი იძულებული იყო მიეღო ეს უმძიმესი გადაწყვეტილებები, რომლებიც მიმართული იყო მხოლოდ და მხოლოდ ჩვენი სამშვიდობოების სიცოცხლის და ცხინვალის მშვიდობიანი მოსახლეობისა და სამხრეთ ოსეთის სხვა დასახლებული პუნქტების მაცხოვრებლების დაცვისაკენ. ამ შემთხვევაში კი საქართველოს ტერიტორიულ მთლიანობაზე ადრინდელ საზღვრებში საუბარიც კი არ შეიძლება", _ აცხადებს სერგეი ლავროვი.
შეგახსენებთ, რომ ასტანის ეუთოს სამიტი მთავარი პოლიტიკური დოკუმენტის მიღების გარეშე დასრულდა, რომელიც კონფლიქტების მოწესრიგების შესახებ სამოქმედო გეგმის მიღებას ისახავდა მიზნად. დოკუმენტის მიღება რუსეთის პოზიციის გამო ვერ მოხერხდა.
