ბათუმში, კლინიკაში გარდაიცვალა 20 წლის ბიჭი, რომელსაც 12 ივნისს, მშენებლობიდან გადმოვარდნილი ხის ძელი დაეცა. ინფორმაციას "ბათუმელები" ავრცელებს.

ახალგაზრდა 11 ივლისს გარდაიცვალა. მძიმედ დაშავების შემდეგ, მას ნეიროქირურგიული ოპერაცია ჩაუტარდა, თუმცა რეანიმაციულ განყოფილებაში დარჩა და გარდაცვალებამდე ხელოვნური სუნთქვის აპარატზე იყო მიერთებული.

ტრაგიკული შემთხვევა კობალაძის ქუჩაზე მოხდა, სადაც კომპანია DS გრუპი აშენებს მრავალსართულიან საცხოვრებელ კორპუსს.

12 ივლისს, კომპანია DS გრუპის ხელმძღვანელმა, ოთარ ბერიძემ "ბათუმელებთან" საუბრისას განაცხადა, რომ კომპანიის ბრალეულობა არ დადასტურდა და ბიჭს სავარაუდოდ ძლიერი ქარის გამო დაეცა თავში სამშენებლო ნივთი.

სამშენებლო კომპანიაში ირწმუნებიან, რომ უსაფრთხოების ყველა ნორმა დაცული აქვთ, თუმცა გამოძიება ჯერ არ დასრულებულა და არ გარკვეულა, რა მოხდა სინამდვილეში.

„ეს არ იყო ძელი, ხის კოჭა იყო, რომელიც 36 კილოგრამს იწონის და ზემოდან კიდევ რკინის არმატურები ეწყო. კამერებშიც ჩანს ეს ყველაფერი, გრიგალი იყო და გადმოვარდა 250 მეტრის მანძილზე,“ – ამბობს ოთარ ბერიძე.

მისი თქმით, მშენებლობიდან ჩამოვარდნილი ნივთი არ იყო სამშენებლო ნარჩენი და ხის კოჭა მე-20 სართულიდან გადმოვარდა, სადაც მშენებლობა მიმდინარეობდა.

ბათუმის მერიის მუნიციპალური ინსპექციის პრესცენტრის ინფორმაციის თანახმად, "ინციდენტთან დაკავშირებით დარღვევა არ დაფიქსირებულა".