ევროკავშირის საბჭოს პრეზიდენტი ჰერმან ვან რომპეი საქართველოს ხელისუფლების სამშვიდობო ინიციატივას მიესალმება. ამის შესახებ ჰერმან ვან რომპეიმ ასტანაში მიმდინარე ეუთოს სამიტზე სიტყვით გამოსვლისას განაცხადა.
"მინდა შემთხვევით ვისარგებლო და მივესალმო საქართველოს ხელისუფლების გადაწყვეტილებას ძალის გამოუყენებლობის შესახებ", - განმარტა მან.
ამასთან, ევროკავშირის საბჭოს პრეზიდენტმა საქართველოში ეუთოს მისიის ყოფნის მნიშვნელობაზე ისაუბრა და ყველა შესაბამის მხარეს მოუწოდა, აღნიშნულს ხელი არ შეუშალოს.
"ჩვენ მოვუწოდებთ ყველა შესაბამის ძალებს საქართველოში ეუთოს მისიების აღდგენისკენ. განახლებული ძალისხმევა გვმართებს უსაფრთხოების, ჰუმანიტარული და ადამიანის უფლებების საკითხების მოსაგვარებლად, რაც სრულად უნდა შეესაბამებოდეს 2008 წლის "ცეცხლის შეწყვეტის შესახებ" შეთანხმებას, რა თქმა უნდა, საქართველოს ტერიტორიული მთლიანობის სრული გათვალისწინებით", - განმარტა მან.
შეგახსენებთ, რომ ასტანაში ეუთოს სამიტი მიმდინარეობს.
