ტარიფებთან დაკავშირებით საკრებულომ თავისი ფუნქციები მერიას გადააბარა - ამის შესახებ საკრებულოს წევრმა თინა ხიდაშელმა საკრებულოს სხდომის დასრულების შემდეგ განაცხადა.
საკრებულოს სხდომაზე მუნიციპალურ ტრანსპორტზე ტარიფის 10 თეთრით გაძვირება დამტკიცდა, რასაც თინა ხიდაშელმა მხარი არ დაუჭირა.
"ტრანსპორტის ღირებულის გაზრდა ერთი თვის წინ დაიწყო, როდესაც მერიამ ავტობუსები შეამცირა. დღეს ეს პროცესი გაგრძელდა და დარწმუნებული ვარ, მომავალ წელს მგზავრობის მეორე და მესამე ღირებულებაც გაძვირდება. მთავრობა დანაპირებს რომ არ ასრულებს, რეალურად ჩანს. საკრებულომ თავისი ფუნქციები დაკარგა და ეს ფუნქციები მერიას გადააბარა", - განაცხადა ხიდაშელმა.
დღეს საკრებულომ მიიღო გადაწტყვეტილება, რომლის მიხედვითაც, 6 დეკემბრიდან თბილისში არსებულ მუნიციპალურ ტრანსპორტზე (ავტობუსი, მეტრო) მგზავრობის ღირებულება 10 თეთრით გაძვირდება. ტარიფი უცვლელი რჩება მათთვის, ვისთვისაც შეღავათები იყო დაწესებული.