აშშ მიმდინარე წლის თებერვალში შეშფოთებას გამოხატავდა საფრანგეთის გადაწყვეტილების გამო რუსეთისათვის "მისტრალის" მიყიდვასთან დაკავშირებით. ინფორმაციას ამის შესახებ "ფრანს პრესი" ინტერნეტ გვერდ " WikiLeaks "-ზე გამოქვეყნებულ მასალებზე დაყრდნობით ავრცელებს.
სააგენტოს ინფორმაციით, ინტერნეტ გვერდ " WikiLeaks "-ის მიერ გამოქვეყნებულ მასალებში ასევე არის საფრანგეთის თავდაცვის მინისტრის ერვე მორენისა და მისი ამერიკელი კოლეგის რობერტ გეიტსის სატელეფონო საუბრები. ისინი ერთმანეთს პარიზში 8 თებერვალს შეხვდნენ.
"აღნიშნული გარიგება არასწორ სიგნალს მიაწვდის რუსეთსა და ჩვენს მოკავშირეებს ცენტრალურ და აღმოსავლეთ ევროპაში", _ მოყვანილია დოკუმენტში გეიტსის სიტყვები, რომელიც ასევე აღნიშნავს, რომ აღმოსავლეთ ევროპის ქვეყნები "ამ დრომდე ფრთხილობენ რუსეთთან და არ იციან თუ რამდენად შეიძლება ენდონ დასავლეთს".
თავის მხრივ, ამის საპასუხოდ, გამოქვეყნებული დოკუმენტების მიხედვით, საფრანგეთის თავდაცვის მინისტრი აცხადებს, რომ აღნიშნული გარიგება რუსეთის ფედერაციის სამხედრო პოტენციალის გაძლიერებაზე არ აისახება, ასე რომ შეშფოთებისათვის უსაფრთხოებასთან დაკავშირებით არავითარი საფუძველი არ არსებობს.
შეგახსენებთ, რომ ინტერნეტ გვერდ " WikiLeaks "-ის მიერ გამოქვეყნებულია 250 ათას საიდუმლო მასალაზე მეტი, დეპეშები და წერილები, რომლებსაც ამერიკული საელჩოები მთელს მსოფლიოში ვაშინგტონში აგზავნიდნენ.
" WikiLeaks "-სმა თავისი მასალები რიგ დასავლურ გამოცემებს მიაწოდა, რომლებმაც მათგან ამონარიდების გამოქვეყნება დაიწყეს. დოკუმენტებიდან ამონარიდებს აქვეყნებენ " The Guardian "-ი, " The New York Times "-ი, " Spiegel Online "-ი, " El Pais "-ი და " Le Monde ".
