"ქრისტიან-დემოკრატები" წყლის გაზრდილი ტარიფის გაუქმების მოთხოვნით სასამართლოში სარჩელს შეიტანენ.
ამის შესახებ "ქრისტიან-დემოკრატების" ლიდერმა გიორგი თარგამაძემ დღეს გამართულ პრესკონფერენციაზე განაცხადა.
"ჩვენ ყველა გზას მივმართავთ, მათ შორის სასამართლოში სარჩელს შევიტანთ, რომ ხელისუფლებასა და კომპანია "თბილისის წყალს" პრივატიზაციის ხელშეკრულებით ნაკისრი ვალდებულებების შესრულება ვაიძულოთ, რომლის თანახმადაც წყლის ტარიფის გაზრდა დასაშვებად მხოლოდ 2014 წლისთვის იყო მიჩნეული", - აღნიშნა თარგამაძემ.
მისივე შეფასებით, წყლის ტარიფის გაძვირებასთან დაკავშირებით მიღებული გადაწყვეტილება ანტიკონსტიტუციურია და ამით დედაქალაქის მერმა გიგი უგულავამ მოსახლეობა კიდევ ერთხელ მოატყუა.
"საქართველოში საგადასახადო წნეხი იზრდება, კომუნალური ტარიფები მატულობს, ფასების ზრდას ვერანაირი შემოსავლის ზრდა ვეღარ ეწევა. უმუშევრობის მაღალი კოეფიციენტის გათვალისწინებით, ქვეყანა სოციალური კატასტროფის ახალ, უფრო მძიმე ნიშნულს უახლოვდება, რომლის ყველაზე მკაცრი გამოხატულება მთავარ სასიცოცხლო პროდუქტებსა და მომსახურებაზე სითბოზე, წყალზე, გადაადგილებაზე ხელმიუწვდომლობა იქნება," - აღნიშნა "ქრისტიან-დემოკრატების" ლიდერმა.
აღნიშნულთან დაკავშირებით, დღეს საპარლამენტო ფრაქცია "ქრისტიან-დემოკრატები" პარლამენტის ბიუროს მიმართავენ, რათა შესაბამის კომიტეტს სხდომის დაუყოვნებლივ მოწვევა დაევალოს. თავის მხრივ, კომიტეტი საკანონმდებლო ორგანოში მთავრობისა და მარეგულირებელი კომისიის იმ წევრებს დაიბარებს, რომლებმაც "ანტიკონსტიტუციურ და არაკანონიერ გადაწყვეტილებას" წყლის ტარიფის მატებასთან დაკავშირებით ხელი მოაწერეს.
