დღეს, ორბელიანების სასახლეში, 14-მა ახალგაზრდულმა არასამთავრობო ორგანიზაციამ ხელი მოაწერა საქართველოს ევროპული ინტეგრაციის მხარდამჭერ ერთთობლივ დეკლარაციას. ხელმოწერის ცერემონიას ესწრებოდა საქართველოს პრეზიდენტი სალომე ზურაბიშვილი.
ახალგაზრდულმა ორგანიზაციებმა თხოვნით მიმართეს ევროკავშირის უმაღლესი ინსტიტუტების ხელმძღვანელ პირებს, რათა დადებითად გადაწყდეს საქართველოსათვის ევროკავშირის წევრობის კანდიდატობის მინიჭების საკითხი.
"საზეიმოდ ვაცხადებთ, რომ საქართველო ბრუნდება ისტორიულ, ევროპულ ოჯახში! ბრუნდება რწმენითა და ენთუზიაზმით, იმედით, რომ გააძლიერებს და ახალ მუხტს შესძენს მის განვითარებას! ხმას შეუწყობს სხვა ევროპულ ხალხებს, ისე, როგორც ეს ქართულ მრავალხმიანობას შეშვენის! საქართველო ბრუნდება ტოლერანტობის მრავალსაუკუნოვანი კულტურით, რომელიც ესოდენ სჭირდება თანამედროვე ევროპას.
მივმართავთ თხოვნით ევროკავშირის უმაღლესი ინსტიტუტების ხელმძღვანელ პირებს, ევროპელ ლიდერებს, რათა დადებითად გადაწყდეს საქართველოსათვის ევროკავშირის წევრობის კანდიდატობის მინიჭების საკითხი და დაიწყოს მოლაპარაკება წევრად გახდომის შესახებ.
ვაცნობიერებთ რა იმ როლსა და მნიშვნელობას, რომელიც ახალგაზრდებს ევროპული ინტეგრაციის პროცესის ეფექტიანად გაგრძელებაში გვაქვს, ვიღებთ პასუხისმგებლობას, ჩვენი ცოდნა, იდეები და ენერგია მივმართოთ ამ პროცესის ხელშეწყობისაკენ", - აღნიშნულია დეკლარაციაში ,,ახალგაზრდების დეკლარირებული ნება და მხარდაჭერა საქართველოს ევროპული ინტეგრაციის მიმართ".
"ევროპული ახალგაზრდული ცენტრის" დამფუძნებელმა გიორგი მამულაშვილმა მადლობა გადაუხადა საქართველოს პრეზიდენტს იდეის მხარდაჭერისათვის და აღნიშნა, რომ ახალგაზრდული არასამთავრობო ორგანიზაციები გაერთიანებისაკენ პირველ ნაბიჯებს დგამენ და სურთ, რომ მათი მაგალითი სხვებისათვის მისაბაძი გახდეს.
"მინდა მადლობა გადავუხადო საქართველოს პრეზიდენტს ჩვენი ახალგაზრდული ინიციატივის მხარდაჭერისათვის, იმისთვის, რომ დღეს ამ ორბელიანების ისტორიულ სასახლეში გვეძლევა შესაძლებლობა ხელი მოვაწეროთ ამ დოკუმენტს და საერთაშორისო თანამეგობრობას ჩვენი ხმა მივაწვდინოთ. დღეს, ჩვენი, ახალგაზრდობის ხმა საქართველოს პრეზიდენტის მხარდაჭერით კიდევ უფრო ხმამაღლა გაისმა. ჩვენ პირველ ნაბიჯს ვდგამთ, ვერთიანდებით ახალგაზრდები და გვსურს, რომ ეს იყოს მისაბაძი მაგალითი", - განაცხადა გიორგი მამულაშვილმა.
დოკუმენტს ხელს აწერენ ორგანიზაციები: ევროპული ახალგაზრდული ცენტრი, ევროპულ-ქართული ინსტიტუტი, YATA საქართველო, ProActive Group Georgia / პროაქტივ ჯგუფი საქართველო, გენერალ მაზნიაშვილის სახელობის ახალგაზრდული ლეგიონი, საქართველოს ევროპისმცოდნეთა ასოციაცია, საქართველოს სტუდენტური პარლამენტი, თბილისის სახელმწიფო უნივერსიტეტის სტუდენტური თვითმმართველობა, კავკასიის საერთაშორისო უნივერსიტეტის სტუდენტური თვითმმართველობა, თბილისის სახელმწიფო უნივერსიტეტის მდგრადი განვითარების სტუდენტური ჰაბი, ყვარლის ევროკლუბი, ადგილობრივი განვითარების ჯგუფი-ზემო სვანეთი" (LAG) და "ახალგაზრდა გამომგონებელი".
დეკლარაცია ღიაა ხელმოსაწერად ყველა დაინტერესებული ახალგაზრდისა თუ ორგანიზაციისათვის, რომელიც იზიარებს დოკუმენტის ძირითად პრინციპებს.
დეკლარაციაზე ხელმოწერა ელექტრონულად შესაძლებელია ლინკზე: https://manifest.ge/item/3733
