ლტოლვილებისა და იძულებით გადაადგილებულ პირთა რაოდენობამ, რომლებიც ადამიანის უფლებების დარღვევისა და ძალადობის გამო იძულებულნი გახდნენ სახლები დაეტოვებინათ, პირველად ისტორიაში, მსოფლიო მასშტაბით 100 მილიონს გადააჭარბა. აღნიშნული მონაცემები ჟენევაში გაეროს ლტოლვილთა უმაღლესმა კომისარიატმა (UNHCR) გამოაქვეყნა.
უკრაინაში რუსეთის სასტიკმა შეჭრამ და სხვა შეიარაღებულმა კონფლიქტებმა ვითარების ამგვარ განვითარებაში უდიდესი როლი შეასრულა.
გაეროს ლტოლვილთა უმაღლესი კომისრის ფილიპიო გრანდის განცხადებით, აღნიშნული რიცხვი ერთდროულად დამამშვიდებელიც არის და შემაშფოთებელიც.
„ეს უნდა გახდეს განგაშის სიგნალი გამანადგურებელი კონფლიქტების დასასრულებლად, რათა შეწყდეს და აღმოიფხვრას დევნის ძირეული მიზეზები, რამაც უდანაშაულო ადამიანებს გაქცევა აიძულა“, - განაცხადა მან.
გაეროს ახალი მონაცემებით, იძულებით გადაადგილებულ პირთა რაოდენობა მსოფლიოში 2021 წლის ბოლოსთვის 90 მლნ-მდე გაიზარდა ძალადობის ახალი ტალღისა და გაჭიანურებული კონფლიქტების გამო ისეთ ქვეყნებში, როგორებიცა ეთიოპია, ბურკინა-ფასო, მიანმარი, ნიგერია, ავღანეთი და კონგოს დემოკრატული რესპუბლიკა.
ომმა უკრაინაში 2022 წლისთვის 8 მლნ ადამიანი იძულებული გახადა ქვეყნის შეგნით გადაადგილებულიყო. 6 მილიონი კი ლტოლვილად იქცა და ქვეყანა დატოვა.
