ჰოლანდიურმა ლუდის მწარმოებელმა უმსხვილესმა კომპანიამ Heineken-მა რუსეთის ბაზრიდან გასვლის გადაწყვეტილება მიიღო.

"ჩვენ მივედით დასკვნამდე, რომ რუსეთში ბიზნესის ფლობა აღარ არის მდგრადი და მიზანშეწონილი არსებულ გარემოში", - ნათქვამია კომპანიის განცხადებაში.

რუსული ბაზრის სრულ დატოევბამდე, კომპანიის 7 ლუდსახარში გააგრძელებს მუშაობას, რათა წლის დროებით შეინარჩუნოს სამუშაო ადგილები.

ამასთან, ჰოლანდიური კონცერნი აცხადებს, რომ 2022 წლის ბოლომდე, თანამშრომლებს ხელფასები შეუნარჩუნდებათ.

"პრიორიტეტად რჩება ასევე კლიენტების, პარტნიორებისა და მომხმარებლების წინაშე ვალდებულებების შესრულება", - დასძენენ Heineken-ის მესვეურები.

მანამდე Heineken-მა განაცხადა, რომ აჩერებს ინვესტიციებს და იმპორტს რუსეთის ფედერაციაში, ასევე მისი ფლაგმანი ბრენდის Heineken-ის წარმოებასა და რეალიზაციას.

საერთაშორისო სააგენტო Reuters-ის ცნობით, რუსეთის ბაზრიდან გასვლის შედეგად Heineken-ის ზარალი 400 მილიონ ევროს მიაღწევს.

Heineken-ი რუსეთში სიდიდით მესამე ლუდსახარშია. ის ფლობს ისეთ რუსულ ბრენდებს, როგორიცაა "ბოჩკაროვი", "ოხოტა" და "ტრი მედვედა".