რუსეთის სახელმწიფო ტელერადიოკომპანია "კოსტრომა" უკრაინის ტერიტორიაზე რუსეთის 331-ე გვარდიის საჰაერო-სადესანტო პოლკის მეთაურის სერგეი სუხარევისა და კიდევ ოთხი ჯარისკაცის დაღუპვის შესახებ იტყობინება.
ტელერადიოკომპანიის ცნობით, სუხარევის გარდა, მოკლულები არიან უფროსი სერჟანტი სერგეი ლებედევი, სერჟანტი ალექსანდრე ლიმონოვი, კაპრალი იური დეგტიარევი და კაპიტანი ალექსეი ნიკიტინი.
BBC ინფორმაციით, 331-ე გვარდიის საჰაერო სადესანტო პოლკი, რომელსაც მეთაურობდა პოლკოვნიკი სუხარევი, მონაწილეობდა ჩეჩნეთის ომებში, ასევე 2008 წლის რუსეთ-საქართველოს ომში.
უკრაინაში რუსეთის მიერ გაჩაღებული ომის განმავლობაში, უკრაინულმა ძალებმა არაერთი რუსი სამხედრო მაღალჩინოსანი გააუვნებელყვეს, მათ შორის, გენერალ-მაიორი ვიტალი გერასიმოვი, გენერალ-მაიორი ანდრეი სუხოვეცკი, გენერალ-მაიორი ანდრეი კოლესნიკოვი, გენერალ-მაიორი ოლეგ მიტიაევი.
