ევროკავშირი უკრაინას ლეტალურ იარაღსა და აღჭურვილობას მიაწვდის. ეს იქნება ისტორიაში პირველი შემთხვევა, როდესაც ევროკავშირი მესამე ქვეყანას ლეტალურ იარაღს გაუგზავნის. ამის შესახებ 27 თებერვალს, ევროკომისიის პრეზიდენტმა ურსულა ფონ დერ ლაიენმა და ევროკავშირის უმაღლესმა წარმომადგენელმა საგარეო და უსაფრთხოების პოლიტიკის საკითხებში ხოსეპ ბორელმა განაცხადეს.
განცხადება ევროკავშირის საგარეო საქმეთა მინისტრების შეხვედრის წინ გაკეთდა, რომელიც ამ კვირაში მეოთხედ დაიგეგმა.
"პირველად თავის ისტორიაში, ევროკავშირი დააფინანსებს იარაღისა და სხვა ტექნიკური საშუალებების შეძენას და მიწოდებას თავდასხმის ქვეშ მყოფი ქვეყნისთვის. ეს არის გარდამტეხი მომენტი", - თქვა ფონ დერ ლაიენმა.
ჟოზეპ ბორელის განცხადებით, ევროკავშირის ამ დახმარების მიზანია, ლეტალური იარაღის მიწოდება გმირული უკრაინის არმიისთვის, რომელის სასტიკ წინააღმდეგობას უწევს რუს დამპყრობლებს.
უკრაინის შეიარაღებულ ძალებს დახმარებას გაუწევენ ევროკავშირის ახალი სამშვიდობო ინსტრუმენტის - ევროპის სამშვიდობო ფონდის (EPF) ფარგლებში. ის გასულ წელს დაინერგა. მაშინ ევროკავშირი დახმარების სახით მხოლოდ საველე ჰოსპიტლებსა და სამედიცინო აღჭურვილობას განიხილავდა, იარაღის მიწოდებას კი გამორიცხავდა.
