ბრიუსელში, ჩრდილოატლანტიკური ალიანსის წევრი ქვეყნების თავდაცვის მინისტრები იკრიბებიან.
თავდაცვის მინისტერიალის ფარგლებში, რომელიც 16 და 17 თებერვალს გაიმართება, ნატოს წევრი ქვეყნების თავდაცვის მინისტრები ქართველ და უკრაინელ კოლეგებს შეხვდებიან.
საქართველოს თავდაცვის მინისტრ ჯუანშერ ბურჭულაძესა და უკრაინის თავდაცვის მინისტრ ოლექსი რეზნიკოვთან შეხვედრა მინისტერიალის მეორე დღეს, 17 თებერვალს არის დაგეგმილი.
ალიანსის თავდაცვის უწყებების მეთაურების შეხვედრის მთავარი საკითხები უკრაინის ირგვლივ არსებული ვითარება და შავი ზღვის უსაფრთხოება იქნება.
როგორც მანამდე ნატოს გენერალურმა მდივნმა, იენს სტოლტენბერგმა განაცხადა, ალიანსი საქართველოსა და უკრაინის თავდაცვის მინისტრებთან განიხილავს შავი ზღვის უსაფრთხოების გამწვავებულ სიტუაციას და კიდევ ერთხელ დაადასტურებს თავის ერთგულებას უკრაინისა და საქართველოს სუვერენიტეტისა და ტერიტორიული მთლიანობის მიმართ.
როგორც პარლამენტის თავდაცვისა და უშიშროების კომიტეტის თავმჯდომარე, ირაკლი ბერაია ამბობს, მინისტერიალზე მეტად მნიშვნელოვანი თემები იქნება განხილული.
"ნატოს თავდაცვის მინისტაერიალზე ალიანსის წევრი სახელმწიფოები განიხილავენ რეგიონული უსაფრთხოების გარემოს. იმ უმძიმეს ვითარებას, რომელიც შექმნილია უკრაინის ირგვლივ რუსეთის უპრეცედენტო სამხედრო კონცენტრაციის შედეგად. ისაუბრებენ ასევე ალიანსის თავდაცვით შესაძლებლობებზე, საბიუჯეტო პოლიტიკაზე და ფინანსური ტვირთის გადანაწილებაზე, ნატოს პრიორიტეტებზე. ჩვენი ქვეყანა მონაწილეობს ალიანსის პრაქტიკულად ყველა სამიტში და მინისტერიალში, რაც ადასტურებს ალიანსსა და საქართველოს შორის თანამშრომლობის უპრეცედენტოდ მზა დინამიკას“, - განაცხადა ირაკლი ბერაიამ.
