ჟურნალმა Economist-მა 2021 წლის დემოკრატიის ინდექსი გამოაქვეყნა. ყოველწლიური ანგარიშის მიხედვით, 2021 წელს მსოფლიოში დემოკრატიის ხარისხი გაუარესდა.
ანგარიშის მიხედვით, საქართველო, გასული წლის ინდექსის მსგავსად, 91-ე ადგილზე მოხვდა. 2019 წლის ანგარიშში საქართველო 89-ე პოზიციაზე იყო.
ინდექსის მიხედვით, საქართველო კვლავ ჰიბრიდული რეჟიმების კატეგორიას მიეკუთვნება. საქართველოზე წინ არიან უკრაინა, მოლდოვა და სომხეთი.
დემოკრატიის ინდექსი 5 კატეგორიას ემყარება: საარჩევნო პროცესი და პლურალიზმი, სამოქალაქო თავისუფლებები, მთავრობის ფუნქციონირება, პოლიტიკური მონაწილეობა და პოლიტიკური კულტურა.
5 კატეგორიის 60 ინდიკატორზე დაყრდნობით, მსოფლიოს სახელმწიფოები კლასიფიცირდება 4 სხვადასხვა ჯგუფად: სრული დემოკრატია, არასრულყოფილი დემოკრატია, ჰიბრიდული რეჟიმი და ავტორიტარული რეჟიმი.
დემოკრატიის ინდექსი მსოფლიოს 167 ქვეყნის დემოკრატიის მდგომარეობას აფასებს.
რეიტინგში წამყვან პოზიციებს იკავებენ - ნორვეგია, ახალი ზელანდია, ფინეთი, შვედეთი, ისლანდია. ბოლო, ყველაზე უარეს პოზიციებს კი ავღანეთი, ჩადი, სირია, ცენტრალური აფრიკის რესპუბლიკა, კონგოს დემოკრატიული რესპუბლიკა და ჩრდილოეთ კორეა ინაწილებენ.
