უკრაინის პრეზიდენტმა ვოლოდიმირ ზელენსკიმ უკრაინიდან ზოგიერთი ქვეყნის საელჩოს თანამშრომელთა და დიპლომატების ოჯახების ევაკუაციას შეცდომა უწოდა. ამის შესახებ ზელენსკიმ უცხოელ ჟურნალისტებთან საუბრისას განაცხადა.
"ვფიქრობ, რომ ეს შეცდომ იყო", - განაცხადა მან და დასძინა, რომ არსებულ ვითარებაში საელჩოს ყველა კადრი მნიშვნელოვანია.
ამასთან, ზელენსკიმ აღნიშნა, რომ მარიუპოლშიც კი, კონტაქტის ხაზთან, ჩვეულებრივ განაგრძობენ მუშაობას ბერძნული დიპლომატიური კორპუსის წარმომადგენლები.
"ეს არის ძალიან მნიშვნელოვანი სიგნალი. ყველა აკვირდება, როგორ რეაგირებენ ევროკავშირის ესა თუ ის ქვეყანა, დიდი ბრიტანეთი ან აშშ. ვფიქრობ, საელჩოს თანამშრომლები აქ უნდა იყვნენ. ისინი არიან კაპიტნები, დიპლომატიური კორპუსის კაპიტნები, პატივსაცემი ქვეყნების წარმომადგენლები და კაპიტნები ბოლოს ტოვებენ ხომალდს. არა მგონია, რომ აქ "ტიტანიკი" იყოს, უკრაინა წინ მიიწევს", - განაცხადა ზელენსკიმ.
შეგახსენებთ, 24 იანვარს ცნობილი გახდა, რომ შეერთებული შტატების სახელმწიფო დეპარტამენტმა უკრაინაში აშშ-ის საელჩოდან დიპლომატების ოჯახის წევრთა და ზოგიერთი თანამშრომლის ევაკუაციის ბრძანება გასცა. მსგავს ქმედებას მიმართეს ბრიტანეთმა, ავსტრალიამ და კანადამ. ევროკავშირმა განაცხადა, რომ მათ წარმომადგენლობა ჯერჯერობით არ გეგმავს ასეთი ნაბიჯის გადადგმას.
26 იანვარს შეერთებული შტატების საელჩომ მოუწოდა უკრაინაში მყოფ ამერიკის მოქალაქეებს, განიხილონ ქვეყნის დაუყოვნებლივ დატოვების შესაძლებლობა.
