მოლდოვის პარლამენტმა, მთავრობის წარდგინებით, ქვეყანაში 60 დღით საგანგებო მდგომარეობა გამოაცხადა.
საგანგებო მდგომარეობის გამოცხადების გადაწყვეტილება მოლდოვამ მას შემდეგ მიიღო, რაც რუსული კონცერნი "გაზრომპი" იანვრის თვის დავალიანების გადაუხდელობის გამო, 21 იანვრიდან გაზის მიწოდების შეწყვეტით დაემუქრა.
მთავრობის წინადადებას მხარი 58-მა დეპუტატმა დაუჭირა.
მოლდოვის ხელისუფლებამ "გაზპრომს" სთხოვა იანვრის გადასახადის გადავადება, მაგრამ კრემლის საფარქვეშ მოქმედმა რუსულმა კომპანიამ უარი განაცხადა.
მოლდოვის ვიცე-პრემიერმა ანდრეი სპინუმ პარლამენტის სესიაზე გამოსვლისას განაცხადა, რომ წინა დღით "მოლდოვაგაზმა" "გაზპრომს" 7 მილიონი დოლარი გადაურიცხა და კიდევ 8 მილიონ დოლარს 20 იანვარს გადაურიცხავს.
"ჯამში იანვრისთვის 38 მილიონ დოლარზე მეტი იქნება წინასწარ გადახდილი და კიდევ 25 მილიონის გადახდა მოგვიწევს დავალიანების დასაფარად", – განაცხადა სპინუმ.
მოლდოვაში დაწესებული საგანგებო მდგომარეობა ქვეყანაში ენერგიის "რაციონალიზებულ" მოხმარებას გულისხმობს.
ასეთ ნაბიჯს მოლდოვამ გასული წლის ოქტომბერშიც მიმართა, როდესაც "გაზპრომთან" ახალი კონტრაქტის შესახებ რთული მოლაპარაკებების დროს, ქვეყანა ენერგოდეფიციტის საფრთხის წინაშე აღმოჩნდა. ხანგრძლივი მოლაპარაკებების შემდეგ, მხარეები მომდევნო 5 წლის განმავლობაში გაზის მიწოდებაზე შეთანხმდნენ.
ფოტო: Reuters