რუსეთის თავდაცვის სამინისტროს ცნობით, კოლექტიური უსაფრთხოების ხელშეკრულების ორგანიზაციის ეგიდით გადასროლილი რუსი სამხედროების ყაზახეთიდან გაყვანის პროცესი დასასრულს მიუახლოვდა.
უწყების ინფორმაციით, ბოლო ოთხმა რუსულმა სამხედრო-სატრანსპორტო ბორტმა ნურ-სულთანი და ალმათი უკვე დატოვა.
"სამშვიდობოების ბოლო ქვედანაყოფები და სამშვიდობო კონტინგენტის სარდლობა გენერალ-პოლკოვნიკ, რუსეთის საჰაერო სადესანტო ძალების მეთაურ ანდრეი სერდიუკოვის ხელმძღვანელობით, ამ თვითმფრინავებით შინ ბრუნდებიან", - ნათქვამია განცხადებაში.
კოლექტიური უსაფრთხოების ხელშეკრულების ორგანიზაციას ყაზახეთში სამშვიდობოების გაგზავნის თხოვნით, მასშტაბური საპროტესტო აქციების ფონზე, პრეზიდენტმა ყასიმ ჟომართ-თოყაევმა მიმართა. ორგანიზაციამ თოყაევის თხოვნა მყისიერად დააკმაყოფილა.
რუსეთის ეგიდით მოქმედი მისიის ფარგლებში, ყაზახეთში რუსეთიდან, ბელარუსიდან, ყირგიზეთიდან და სომხეთიდან 2 ათასზე მეტი სამხედრო და 250 ერთეული ტექნიკა ჩავიდა.
11 იანვარს თოყაევმა განაცხადა, რომ ქვეყანაში სიტუაცია დასტაბილურდა და ორ დღეში სამშვიდობოების გაყვანა დაიწყება.