თურქეთის პრეზიდენტ რეჯებ თაიფ ერდოღანის განცხადებით, მიუხედავად ანკარასა და ბრიუსელს შორს ურთიერთობების პრობლემებისა, თურქეთი ევროკავშირში გაწევრიანებას კვლავ თავის სტრატეგიულ პრიორიტეტად მიიჩნევს.
"მიუხედავად ყველა უსამართლობისა, რომელსაც ჩვენ ამ გზაზე შევეჩეხეთ, ევროკავშირის წევრობა რჩება ჩვენთვის სტრატეგიულ პრიორიტეტად და ვაგრძელებთ ამ მიმართულებით სვლას", - განაცხადა ერდოღანმა 13 იანვარს ანკარაში ევროკავშირის დიპლომატებთან შეხვედრაზე.
ერდოღანმა იმედი გამოთქვა, რომ ევროკავშირი წელს მაინც შეცვლის "სტრატეგიული შორსმჭვრეტელობის ტაქტიკას" და აქტიურად განავითარებს თურქეთთან ურთიერთობებს.
"როგორც კანდიდატი ქვეყანა, ჩვენ მზად ვართ გავაძლიეროთ თანამშრომლობა და დიალოგი ევროკავშირთან. ჩვენს საერთო ინტერესებშია, ვიმოქმედოთ გრძელვადიანი სტრატეგიული პერსპექტივით და არ ვიხელმძღვანელოთ ცრურწმენებით ან შიშებით", - განაცხადა თურქეთის პრეზიდენტმა.
თურქეთმა ევროკავშირთან ასოცირების ხელშეკრულებას ხელი 1963 წელს მოაწერა. 1987 წელს კი შეიტანა განცხადება კავშირის წევრობის შესახებ. ამასთან, გაწევრიანების შესახებ მოლაპარაკებები მხოლოდ 2005 წელს დაიწყო და ევროკავშირსა და თურქეთს შორის უთანხმოების გამო არაერთხელ შეჩერდა.