დიდ ბრიტანეთში, 57 წლის ქირურგ საიმონ ბრამჰოლს, რომელმაც ოპერაციისას პაციენტების ღვიძლზე საკუთარი ინიციალები ამოწვა, ბრიტანეთის ექიმთა რეესტრიდან ამოიღეს, რაც ლიცენზიის გაუქმების ტოლფასია.
საქმე განიხილა სამედიცინო პრაქტიკოსთა ტრიბუნალმა, რომლის განცხადებითაც ქირურგის ქმედება პროფესიულ ქედმაღლობად შეფასდა, რამაც შეარყია საზოგადოების ნდობა ექიმების მიმართ.
მანამდე, სასამართლომ ქირურგს ექიმისთვის შეუფერებელი ქმედების გამო საზოგადოებისთვის სასარგებლო შრომა და 10 ათასი ფუნტის ოდენობით ჯარიმა დააკისრა.
საიმონ ბრამჰოლმა აღიარა, რომ 2013 წელს სპეციალური სამედიცინო ლაზერით ორი პაციენტის ღვიძლზე საკუთარი ინიციალები ამოწვა, მაშინ როდესაც, ბირმინგემის ჰოსპიტალში მუშაობდა.
ქირურგმა ბრალი 2017 წლის დეკემბერში სასამართლოს წინაშე აღიარა, მაშინ მას 10 000 ფუნტის ოდენობის ჯარიმა დაეკისრა. 2020 წლის დეკემბერში კი საექიმო საქმიანობა შეუჩერეს სულ მცირე 5 თვით. სასამართლოს ეს გადაწყვეტილება რამდენიმე დღის წინ გაუქმდა და ექიმს საქმიანობის უფლებაც აღუდგა. ბრიტანეთის სამედიცინო გენერალურმა საბჭომ გაასაჩივრა ექიმისთვის სამედიცინო საქმიანობის უფლება აღდგენა, რის შემდეგაც საქმე კვლავ სამედიცინო ტრიბუნალს გადაეცა.
ტრიბუნალის განცხადებით, მიუხედავად იმისა, რომ არცერთ პაციენტს არ მიუღია ხანგრძლივი ფიზიკური ზიანი, ბრამჰოლის ქმედებებმა ერთ-ერთ მათგანს "მნიშვნელოვანი ემოციური ზიანი" მიაყენა. ტრიბუნალმა ასევე აღნიშნა, რომ ექიმთა რეესტრიდან ამოღება პროპორციული ზომაა, რადგან სიცოცხლის გადარჩენის საერთო კონტექსტი არ ამსუბუქებდა ქირურგის მიერ პაციენტების ღირსების შემლახავ ქმედებას.