ბულგარეთის დედაქალაქ სოფიაში კოვიდრეგულაციების გაპროტესტების მიზნით, მასშტაბური დემონსტრაცია გაიმართა. იუწყება ადგილობრივი მედია.
გავრცელებული ინფორმაციით, საპროტესტო აქციის ზოგიერთმა მონაწილემ პარლამენტის შენობაში შეჭრა სცადა, თუმცა მათი მცდელობა პოლიციის მიერ დროულად იქნა აღკვეთილი. იუწყებიან, რომ აქციის რამდენიმე მონაწილე დააკავეს.
ვრცელდება ცნობები, რომ საპროტესტო აქცია დემონსტრანტებსა და პოლიციელებს შორის შეტაკებებში გადაიზარდა, რის შედეგადაც, დაშავდა რამდენიმე პოლიციელი და აქციის მონაწილე.
საბოლოოდ, აქციის მონაწილეებმა უკან დაიხიეს და პოლიციამ პარლამენტის შენობას ალყა შემოარტყა.
პარლამენტის წინ მდებარე პარკში 1000-მდე აქციის მონაწილე დარჩა. მათი თქმით, ისინი ტერიტორიის დატოვებას არ აპირებენ, ვიდრე მოთხოვნები არ შესრულდება. დემონსტრანტები ვაქცინაციისა და ნიღბის ტარების ვალდებულების გაუქმებას ითხოვენ.
პრემიერ-მინისტრმა კირილ პეტკოვმა აქციის მონაწილეებს სიმშვიდისკენ მოუწოდა, მან განაცხადა, რომ მზად არის მიიღოს საპროტესტო მოძრაობის წარმომადგენლები მათი მოთხოვნების განსახილველად.
ამ დროისთვის, კირილ პეტკოვი, ბულგარეთს პრეზიდენტი რუმენ რადევი და რამდენიმე მინისტრი თვითიზოლაციაშ იმყოფებიან, მას შემდეგ, რაც ორშაბათს, უშიშროების საბჭოს სხდომაზე კორონავირუსით ინფიცირებულთან კონტაქტი ჰქონდათ.