შეერთებული შტატების ხაზინამ მოჭრა მონეტები პოეტისა და სამოქალაქო აქტივისტის, მაია ენჯელოუს გამოსახულებით.
ამრიგად, მაია ენჯელოუ გახდა პირველი შავკანიანი ქალი, რომელიც ამერიკულ 25-ცენტიან მონეტაზე გამოსახეს. მონეტის წინა მხარეს გამოსახულია შეერთებული შტატების პირველი პრეზიდენტი ჯორჯ ვაშინგტონი.
ენჯელოუ იყო პირველი შავკანიანი ქალი, რომელმაც დაწერა და წაიკითხა ლექსი ამერიკის პრეზიდენტის ინაუგურაციაზე.
როგორც იუწყებიან, 25-ცენტიან მონეტებზე კიდევ სხვა ამერიკელი ქალების გამოსახვა იგეგმება, რომელთაც წარუშლელი კვალი დატოვეს ამერიკის ისტორიაში.
მაია ენჯეოლოუს გამოსახვას გამოეხმაურა შტატების სახაზინო დეპარტამენტის პირველი ქალი მდივანი ჯანეტ იელენი.
"ყოველ ჯერზე, როდესაც ჩვენ ვახდენთ ვალუტის დიზაინის ცვლილებას, გვაქვს შესაძლებლობა, ვთქვათ რაღაც მნიშვნელოვანი ჩვენს ქვეყანაზე - რა არის ჩვენი ღირებულება და როგორ განვვითარდით, როგორც საზოგადოება", - თქვა მდივანმა.
მაია ენჯელოუ 2014 წელს, 86 წლის ასაკში გარდაიცვალა.
ენჯელოუს საყოველთაო ცნობადობა და აღიარება მოუტანა პირველმა რომანმა, "ვიცი, რად გალობს გალიის ჩიტი" (1969), რომელშიც მან თავისი ბავშობისა და მოზარდობის წლები აღწერა. მას აქებდნენ რომანში რასიზმისა და სოციალური უთანასწორობის საკითხების წამოჭრის გამო.
2010 წელს პრეზიდენტმა ობამამ ენჯელოუს შეერთებული შტატების უმაღლესი სამოქალაქო ჯილდო, თავისუფლების საპრეზიდენტო მედალი გადასცა.
