ყაზახეთის პრეზიდენტმა ყასიმ ჟომართ-თოყაევმა 10 იანვარი გლოვის დღედ გამოაცხადა.
თოყაევის პრესსპიკერის განცხადებით, გლოვის დღის გამოცხადება, ქვეყანაში მასობრივი არეულობის დროს დაღუპულთა ხსოვნას უკავშირდება.
"ყაზახეთის სხვადასხვა რეგიონში მომხდარ ტრაგიკულმა მოვლენებთან დაკავშირებით, პრეზიდენტმა გადაწყვიტა, 2022 წლის 10 იანვარი ეროვნული გლოვის დღედ გამოაცხადოს", - ნათქვამია პრესსპიკერის განცხადებაში.
შეგახსენებთ ,მასობრივი საპროტესტო აქციები გაზის გაზრდილი ფასის გამო 2 იანვარს, ქვეყნის სამხრეთ-დასავლეთით მდებარე რეგიონში დაიწყო. მოგვიანებით, საპროტესტო აქციები მთელი ქვეყნის მასშტაბით მასობრივ დემონსტრაციებში გადაიზარდა, სადაც გაჩნდა ეკონომიკური და პოლიტიკური მოთხოვნები.
მწვავე პროტესტების ფონზე გადადგა ქვეყნის მთავრობა.
4 და 5 იანვარს ვითარება განსაკუთრებით დაიძაბა ქალაქ ალმათში, სადაც დემონსტრანტებისა და უსაფრთხოების ძალების შეტაკებები გაიმართა.
პრეზიდენტმა ყასიმ ჟომართ-თოყაევმა აქციის მონაწილეებს ტერორისტები უწოდა და მათი თავდასხმა ყაზახეთზე განხორციელებულ აგრესიის აქტად შეაფასა. თოყაევმა მითითება მისცა სამართალდამცავებს, რომ დემონსტრანტებს ცეცხლი გაუფრთხილებლად გაუხსნან.
თოყაევმა დახმარების თხოვნით კოლექტიური უსაფრთხოების ხელშეკრულების ორგანიზაციას მიმართა, რის შემდეგაც, ქვეყანაში ორგანიზაციის წევრი ქვეყნების სამხედროები განთავსდნენ. კოლექტიური სამშვიდობო ძალების კონტინგენტში რუსეთის, ბელარუსის, სომხეთის, ტაჯიკეთისა და ყირგიზეთის დანაყოფები შედიან.
პრეზიდენტის ადმინისტრაციის ინფორმაციით, არეულობის დროს დაიღუპა 44 ადამიანი, მათ შორის უსაფრთხოების ძალების 18 თანამშრომელი. დაკავებულთა რაოდენობა 4000-ს აჭარბებს.