"ნაციონალური მოძრაობის" ოფისთან მყოფმა მოშიმშილეებმა, რომლებიც მესამე პრეზიდენტის გათავისუფლების მოთხოვნით, პროტესტის ამ ფორმას რამდენიმე დღეა მიმართავენ, მიხეილ სააკაშვილის თხოვნით, შიმშილობა შეწყვიტეს.
როგორც სააკაშვილის ადვოკატმა, გიორგი მშვენიერაძემ განაცხადა, მიხეილ სააკაშვილმა თხოვნით მიმართა მოშიმშილეებს, რომ იგი თავად მიმართავს შიმშილობას, თუკი არ შეწყვეტენ პროტესტის ამ ფორმას.
შიმშილობის შეწყვეტა დაადასტურა "ნაციონალური მოძრაობის" თავმჯდომარემ ნიკა მელიამ. მისი თქმით, ბრძოლის ახალ ეტაპზე გადადიან.
"მიხეილ სააკაშვილი განიცდის თითოეული მოშიმშილის ჯანმრთელობის მდგომარეობას და თავადაც იძულებული გახდება, რომ მანაც განაახლოს შიმშილობა, რისი დაშვების უფლებაც არ გვაქვს არცერთ ჩვენგანს, ვინაიდან, მიხეილ სააკაშვილის მიერ შიმშილობის დაწყება იქნება ფატალური შედეგის მომტანი და ამიტომ, თანამებრძოლებთან ერთად მივიღეთ გადაწყვეტილება, რომ გადავიდეთ ბრძოლის შემდეგ ეტაპზე, რომელიც იქნება მრავალფეროვანი და არაძალადობრივი, მანამ, სანამ ქვეყანაში სამართლიანობა არ გაიმარჯვებს და არ დასრულდება პოლიტიკური მართლმსაჯულება. აქედან გამომდინარე, ჩვენ გადავდივართ ბრძოლის სხვა ეტაპზე", - თქვა ნიკა მელიამ.
