ლაგოდეხის დაცული ტერიტორიები 110 წლის იუბილეს „ყველაზე მრავალფეროვანი და საინტერესო დაცული ტერიტორიის“ ტიტულით ხვდება!

ეროვნული ტურიზმის ინდუსტრიის უმნიშვნელოვანეს დაჯილდოებაში - Welcome to Georgia! წელს 19 დაცული ტერიტორია იღებდა მონაწილეობას. გამარჯვებული საერთაშორისო და ქართველი პროფესიონალებისგან შემდგარმა ჟიურიმ დაასახელა.

საქართველოსა და კავკასიაში პირველი დაცული ტერიტორია, ლაგოდეხის დაცული ტერიტორიები ბიომრავალფეროვნების კუთხით ერთ-ერთი ყველაზე მნიშვნელოვანი ადგილია საქართველოსა და მთელ რეგიონში. აქ არსებული ტყე დღემდე ხელუხლებელ მდგომარეობაშია შენარჩუნებული. 

Welcome to Georgia - ტურიზმის ეროვნული დაჯილდოება ტურიზმისა და მასპინძლობის სფეროში არსებული ყოველწლიური დაჯილდოების ცერემონიაა, რომელიც საქართველოში 2015 წლიდან ტარდება. ღონისძიების მიზანია ხელი შეუწყოს ტურიზმის სექტორის განვითარებას საქართველოში და ქვეყნის ცნობადობის ამაღლებას საერთაშორისო ტურისტულ ბაზარზე. 

იმოგზაურე, გაიცანი და შეიყვარე საქართველოს უნიკალური ბუნება და შეიქმენი დაუვიწყარი მოგონებები!