კორონავირუსის ომიკრონი ვარიანტით გამოწვეული შეშფოთების ფონზე, ნიდერლანდებში მკაცრი ლოკდაუნი ამოქმედდა.
მთავრობის მიერ დაწესებული შეზღუდვების ფარგლებში, 14 იანვრამდე ბარები, სპორტული დარბაზები, სილამაზის სალონები, არაპირველადი საჭიროების მაღაზიები და სხვა საჯარო სივრცეები დაიხურა.
ლოკდაუნის დროს, ოჯახებში სტუმრად მხოლოდ 2 ადამიანის მიღება იქნება ნებადართული. გამონაკლისია 24-26 დეკემბერი, 31 დეკემბერი და 1-ლი იანვარი, ამ დღეებში, 4 სტუმრის მიღება იქნება ნებადართული.
პრემიერ-მინისტრ მარკ რუტეს განცხადებით, დაწესებული შეზღუდვები გარდაუვალი იყო.
ომიკრონი ვარიანტის გავრცელების ფონზე, შეზღუდვები ევროპის სხვადასხვა ქვეყანაშიც დაწესდა, თუმცა ნიდერლანდებში გამოცხადებული ზომები, მათ შორის ყველაზე, მკაცრია.
პრემიერ-მინისტრმა მოსახლეობას მოუწოდა, გადაუდებელი აუცილებლობის გარდა, სახლები არ დატოვონ.
გარდა ამისა, ახალი ზომების ფარგლებში, ქვეყნის მასშტაბით აიკრძალა ყოველგვარი ღონისძიების ჩატარება, გარდა დაკრძალვის ცერემონიისა. დაგეგმილი სპორტული მატჩები მაყურებლის გარეშე გაიმართება.
რესტორნები გატანის სერვისის მეშვეობით გააგრძელებენ მუშაობას.
ნიდერლანდების ჯანდაცვის მესვეურების განცხადებით, ომიკრონი შტამი ახალი წლისთვის დომინანტური გახდება.
