როგორ შეიძლება მოხვდეს კოვიდინფიცირებული კოვიდსასტუმროში?
მას შემდეგ, რაც პანდემია დაიწყო, ხელისუფლებამ აქტიურად დაიწყო პაციენტების გადაყვანა კოვიდსასტუმროებში. ყველამ იცის, რომ როდესაც მსუბუქად მიმდინარეობს ვირუსი, ასეთი პაციენტებისთვის აუცილებელია იზოლაციის პირობებში ყოფნა და მათ მეთვალყურეობს ოჯახის ექიმი.
თუ ადამიანს დაუდასტურდა ვირუსი, პაციენტი ექვემდებარება ბინაზე ან საკარანტინე სივრცეში, ანუ კოვიდსასტუმროში, გადაყვანას. დადასტურების შემთხვევაში, მოქალაქე რეკავს „112“-ში და აცნობებს, რომ ინფიცირებულია. პარალელურად დადასტურებულ შემთხვევებზე ინფორმაციას ყოველდღიურად აწვდიან ,,112“-ს ცენტრებიდან და წინა დღის სტატისტიკა მომდევნო დღეს გამოქვეყნებულ სტატისტიკაში აისახება ხოლმე. თავად „112“ კი, კლინიკური შეფასების მიზნით, ზარს ამისამართებს უბნობრივი პრინციპით.
თუ პირი დაზღვეულია, მაშინ მას სადაზღვევო კომპანიებში ამისამართებენ. შემდგომ ოჯახის ექიმი უკავშირდება თითოეულ ინფიცირებულს.
პირველ შემთხვევაში პაციენტი ონლაინკონსულტაციას გადის ოჯახის ექიმთან . სატელეფონო კონსულტაციით ხდება ანამნეზის შეკრება, პაციენტის საწყისი კლინიკური შეფასება და, მდგომარეობის შესაბამისად, ექიმი იღებს გადაწყვეტილებას, ბინაში დატოვოს, კოვიდსასტუმროში გადაამისამართოს თუ სამედიცინო დაწესებულებაში მოათავსოს.
თუ ადამიანს სახლში შესაფერისი იზოლირებული გარემო არ აქვს და არის იმის საშიშროება, რომ შეიძლება ინფექცია გადაედოს ოჯახის სხვა წევრებსაც, შესაძლოა, ის გადაიყვანონ კოვიდსასტუმროში. ასეთ შემთხვევაში, ისევ ოჯახის ექიმი ატყობინებს ,,112“-ს, რომ აღნიშნული პაციენტი გადასაყვანია და ამ ზარის შემდეგ „112“ უზრუნველყოფს სასწრაფო- სამედიცინო სამსახურის ჩართულობას და სასწრაფოს გადაჰყავს პირი საიზოლაციო სივრცეში, კოვიდსასტუმროში.
კოვიდსასტუმროში გადაყვანა ან ბინაში დატოვება არ არის რეკომენდებული იმ პაციენტებისთვის, რომელთაც აქვთ რომელიმე ქრონიკული დაავადებაა, მაგალითად: ჰიპერტენზია, გულის კორონარული დაავადება, გულის უკმარისობა, ფილტვის ქრონიკული ობსტრუქციული დაავადება, ბრონქული ასთმა, შაქრიანი დიაბეტი, სიმსუქნე, ონკოლოგიური პათოლოგიები, აივ ინფექცია/შიდსი და სხვ. ასევე სასტუმროში არ გადაჰყავთ ბავშვები და ხანდაზმულები 65 წელს ზემოთ;
თუ COVID-19-ის მქონე პაციენტი მოხვდება კოვიდსასტუმროში, აქ უკვე პაციენტის მდგომარეობის მართავენ კოვიდსასტუმროს ბაზაზე მორიგე სამედიცინო ბრიგადები, ექიმი და ექთანი, რომლებიც, ასევე მჭიდრო ურთიერთკავშირში არიან ინფექციონისტებთან და საზოგადოებრივი ჯანდაცვის სპეციალისტებთან.
კოვიდსასტუმროში 20 პაციენტზე - ექიმისა და ექთნის 1 გუნდი მუშაობს. იქ მოთავსებული პაციენტებისათვის, პასუხისმგებელი ექიმის გადაწყვეტილებით, შესაძლებელია კლინიკური და ლაბორატორიული გამოკვლევების ჩატარების ორგანიზება. ამ მიზნებისთვის განისაზღვრება შესაბამისი სამედიცინო კლინიკა, სადაც პაციენტს გადაიყვანენ შესაბამისი კვლევების ჩასატარებლად, პაციენტი სასწრაფოს გადაჰყავს და კვლევების შემდეგ ისევ უკან, სასტუმროში, აბრუნებს.
თუ ადამიანის ჯანმრთელობის მდგომარეობა გაუარესდა ბინაზე ან კოვიდსასტუმროში, პაციენტი, ექიმის გადაწყვეტილებით , აუცილებლად ჰოსპიტალში გადაჰყავთ. ასეთ შემთხვევაშიც ექიმი ატყობინებს ,,112“-ს და აღნიშნულ პაციენტს ათავსებენ შესაბამის კლინიკაში.
პაციენტის სამედიცინო მეთვალყურეობის ბარათი, პაციენტის დაყოვნების პერიოდში, ამავე კოვიდსასტუმროში ინახება, ხოლო პაციენტის ბინაზე გადაყვანის შემდეგ ბარათი გადაეგზავნება ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს, სახელმწიფო კონტროლს დაქვემდებარებულ საჯარო სამართლის იურიდიულ პირს - ჯანმრთელობის ეროვნულ სააგენტოს და შემდგომ ეს ისტორია დაარქივდება 5 წლის ვადით.
კოვიდსასტუმროში მყოფი COVID-19-ით პაციენტების მეთვალყურეობიდან მოხსნა, მათი ბინაზე გაწერა შემდეგი პრინციპით ხდება:
თუ პირი უსიმპტომოა, კოვიდის დადასტურებიდან 10 კალენდარული დღის შემდეგ სრულდება იზოლაცია და მას ხელმეორედ ანტიგენის გამომვლენი ტესტირების ჩატარება არ უწევს. პაციენტს ენიჭება გამოჯანმრთელებულის სტატუსი და მიდის სახლში. მსუბუქი სიმპტომების მქონე პაციენტი სასტუმროს დატოვებს, თუ გასულია 10 დღე და დამატებით 3 უსიმპტომო დღე. არც მას დასჭირდება ანტიგენზე ტესტირება და გამოჯანმრთელებულის სტატუსი ექნება.
სასტუმროში პირის მოთავსებას წყვეტს ოჯახის ექიმი. წინასწარ არავინ იცის, რომელ სასტუმროში გადაიყვანენ პაციენტს. სადაც არის იმ პერიოდში ადგილი, იქ მოხდება მისი გადაყვანა და, რა თქმა უნდა, ექიმის მეთვალყურეობის ქვეშ იქნება. თუ რაიმე მედიკამენტი დასჭირდა, თვითონ სასტუმრო აწვდის ინფორმაციას ჯანდაცვას და ხდება მედიკამენტების მიწოდება.
საქართველოს მოქალაქეს კოვიდსასტუმროში ყოფნისა და მკურნალობის თანხების გადახდა არ უწევს“,- გვითხრა ჯანდაცვის სამინისტროს ცხელი ხაზის ოპერატორმა.
მისი თქმით, უცხო ქვეყნის მოქალაქეებისთვის COVID-19-თან დაკავშირებული ყველა სამედიცინო სერვისი ფასიანია:
"როცა უცხოეთიდან შემოდიან მოქალაქეები და მათ აქვთ ვაქცინაცია გაკეთებული, ისინი არ ხვდებიან სასტუმროში, თუ შემოდიან PCR-ტესტით, მაშინ აუცილებელად დასჭირდებათ მესამე დღეს ისევ PCR -ის გაკეთება საკუთარი ხარჯებით. თუ საქართველოს მოქალაქე შემოდის ქვეყანაში, თუ არ არის ვაქცინირებული, მას უწევს თვითიზოლაციაში ყოფნა 8 დღის განმავლობაში ან განმეორებით PCR-ტექსტის გაკეთება თავისი ხარჯებით. თუ მესამე დღეს დაუდასტურდა კოვიდი და არ აქვს თვითიზოლაციის პირობები, მაშინ გადაიყვანენ კოვიდსასტუმროში, როგორც საქართველოს მოქალაქეს, ასევე - უცხო ქვეყნის მოქალაქესაც და, როგორც უკვე გითხარით, უცხო ქვეყნის მოქალაქეს თავად მოუწევს ყველა ხარჯის დაფარვა“.
გუშინდელი მონაცემებით, ამჟამად კოვიდსასტუმროებში 1172 ადამიანია გადაყვანილი, ქვეყნის მასშტაბით ექიმების მეთვალყურების ქვეშ რჩება 36,023 ინფიცირებული, სტაციონარში 6266 ადამიანი მკურნალობს. უმძიმესია ქვეყანაში გარდაცვლილთა სტატისტიკა, გარდაცვლილია 12, 631 ადამიანი. ეს დიდი ტკივილია ქვეყნისთვის და განსაკუთრებით თითოეული ოჯახისთვის, რომლებმაც საყვარელი ადამიანები დაკარგეს. სწორედ ამიტომ მოუწოდებენ სპეციალისტები ყველას, რომ დროზე აიცრან. გვახსოვდეს, კორონავირუსისგან თავის დაცვის ყველაზე ეფექტიანი საშუალება ვაქცინაციაა.
რეგულაციის წესები
აქვე კიდევ ერთხელ შეგახსენებთ რეგულაციის წესებს. რეკომენდებულია პირბადის ტარება საზოგადოებრივ ტრანსპორტში, დახურულ და ღია სივრცეში - ყველგან, სადაც შეუძლებელია დისტანციის დაცვა;
პირბადის სწორი მოხმარება აუცილებელია, პირბადე უნდა ფარავდეს ცხვირს, პირს და ნიკაპს. ერთჯერადი პირბადე არ უნდა იყოს გამოყენებული მრავალჯერადად;
ხელების ხშირი დაბანა ან/და დეზინფექცია უნდა მოხდეს განსაკუთრებით სამუშაო სივრცეში, კვების ობიექტებში, საზოგადოებრივი თავშეყრის ადგილებში;
აუცილებელია ასევე სოციალური დისტანციის დაცვა და ფიზიკური კონტაქტისგან (გადაკოცნა/ხელის ჩამორთმევა) თავის არიდება; ხალხმრავალი სოციალური ღონისძიებების (ქორწილები, ქელეხები, დაბადების დღეები და ა.შ.) გამართვისა და მათში მონაწილეობისგან თავის შეკავება.
