საქართველოს ყოფილი პრეზიდენტის, მიხეილ სააკაშვილის შეწყალების მოთხოვნით "ნაციონალური მოძრაობის" მხარდამჭერებმა პრეზიდენტის რეზიდენციასთან აქცია გამართეს.
ათონელის რეზიდენციასთან შეკრებილები სალომე ზურაბიშვილს მოუწოდებენ, გამოიყენოს ისტორიული შანსი და ქვეყნის პოლიტიკური კრიზისიდან გამოსაყვანად შეიწყალოს მესამე პრეზიდენტი.
ნაციონალური მოძრაობის“ წევრის, ზაალ უდუმაშვილის განცხადებით, თუ სალომე ზურაბიშვილი სახელმწიფოებრივად აზროვნებს, სააკაშვილის გათავისუფლების ბერკეტი მის ხელშიც არის და ეს უნდა გამოიყენოს.
„მათ ხელში არის დღეს მიხეილ სააკაშვილის გათავისუფლების გასაღები. ეს იქნება სალომე ზურაბიშვილი, ეს იქნება სხვა ფორმა, იურიდიული, ამას ჩვენთვის გადამწყვეტი მნიშვნელობა არ აქვს, ჩვენთვის მთავარი ამოცანა არის, რომ მიხეილ სააკაშვილი გათავისუფლდეს. ერთ-ერთი ბერკეტი სალომე ზურაბიშვილის ხელშიც არის, თუ ის სახელმწიფოებრივად აზროვნებს თუ მის ინტერესში შედის, რომ პოლიტიკური კრიზისი კი არ გაღრმავდეს, არამედ დაიძლიოს, ეს ბერკეტი უნდა გამოიყენოს“, – განაცხადა ზაალ უდუმაშვილმა.
აქციის მონაწილეებმა პრეზიდენტს შეხვედრისთვის ვადა 15.00 საათამდე მისცეს, თუმცა სალომე ზურაბიშვილი მათ არ შეხვდა.
ფოტო: არქივი
