აღმოსავლეთ უკრაინაში კონფლიქტის ესკალაციის საფრთხის ფონზე, 7 დეკემბერს, აშშ-ისა და რუსეთის პრეზიდენტების ჯო ბაიდენისა და ვლადიმირ პუტინის ვირტუალური სამიტი გაიმართა.
გავრცელებული ინფორმაციით, შეხვედრა, რომელიც მედიისთვის დახურული იყო, ორ საათსა და 5 წუთს გაგრძელდა. პუტინი ვირტუალურ სამიტს სოჭში მდებარე რეზიდენციიდან ესწრებოდა, ბაიდენი - ვაშინგტონში, თეთრ სახლში იმყოფებოდა.
შეხვედრის დაწყებამდე ვრცელდებოდა ინფორმაცია, რომ ჯო ბაიდენი თავის რუს კოლეგასთან შეხვედრისას, უკრაინის საზღვართან რუსული ჯარების მასშტაბური კონცენტრაციის საკითხს განიხილავდა.
იუწყებოდნენ, რომ ბაიდენი აპირებდა, გაეფრთხილებინა მოსკოვი უკრაინაზე თავდასხმის შემთხვევაში მისთვის სერიოზული ეკონომიკური შედეგების შესახებ.
თეთრი სახლის წარმომადგენელმა ონლაინ შეხვედრის წინ განაცხადა, რომ შეერთებულმა შტატებმა და ევროპელმა მოკავშირეებმა შეიმუშავეს მკაცრი სანქციების პაკეტი რუსეთის წინააღმდეგ უკრაინაში შეჭრის შემთხვევაში.
გამოცემა Bloomberg-ის ცნობით, აშშ და ევროკავშირი უმსხვილესი რუსული ბანკებისა და რუსეთის პირდაპირი ინვესტიციების ფონდის წინააღმდეგ სანქციების დაწესებას განიხილავენ. ერთ-ერთ ვარიანტად ასევე განიხილება რუსული რუბლის დოლარსა და გირვანქა სტერლინგში კონვერტაციის შეზღუდვა.
CNN-ის ინფორმაციით, ასევე საუბარია საერთაშორისო საგადასახადო სისტემა SWIFT-დან რუსეთის გარიცხვაზეც.
სააგენტო Reuters-ის წყარო ამტკიცებს, რომ განიხილება სანქციები რუსეთის პრეზიდენტის ვლადიმირ პუტინის ახლო გარემოცვის წინააღმდეგ.
პუტინთან სამიტის წინა დღეს ბაიდენმა მოლაპარაკება გამართა გერმანიის კანცლერის მოვალეობის შემსრულებელ ანგელა მერკელთან და საფრანგეთის პრეზიდენტ ემანუელ მაკრონთან.
ვიდეოკონფერენციაზე, რომელსაც ასევე ესწრებოდნენ დიდი ბრიტანეთისა და იტალიის პრემიერ-მინისტრები, ბორის ჯონსონი და მარიო დრაგი, დასავლეთის ქვეყნების წარმომადგენლებმა შეშფოთება გამოთქვეს უკრაინის საზღვარზე რუსული ჯარების თავმოყრის გამო და კრემლს სიტუაციის სასწაროფდ განმუხტვისკენ მოუწოდეს.
მათ ასევე აღნიშნეს, რომ უპირობოდ უჭერენ მხარს უკრაინის სუვერენიტეტსა და ტერიტორიულ მთლიანობას.
ბაიდენისა და პუტინის სამიტის დაწყებამდე აშშ-ის სახელმწიფო მდივანი ენტონი ბლინკენი უკრაინის პრეზიდენტ ვოლოდიმირ ზელენსკის ტელეფონით ესაუბრა. გარდა ამისა, სამიტის შემდეგ ბაიდენი პირადად აცნობებს ზელენსკის პუტინთან მოლაპარაკების შედეგებს.
კრემლმა თავის მხრივ განაცხადა, რომ პუტინსა და ბაიდენს შორის მოლაპარაკებები სამუშაო ხასიათს ატარებს."ამ საუბრისგან არ მოველით რაიმე მნიშვნელოვან გარღვევას".
მოსკოვი დასავლეთისგან ნატოს აღმოსავლეთით გაფართოების შეჩერებას ითხოვს. ამავდროულად, უკრაინა ჩრდილოატლანტიკურ ალიანსში გაწევრიანებას ესწრაფვის, რასაც მოსკოვი წითელი ხაზის გადაკვეთის მცდელობად მიიჩნევს.
ფოტო: არქივი
