ჩინეთი აფრიკის კონტინენტის ატლანტის ოკეანის სანაპიროზე, ეკვატორულ გვინეაში სამხედრო ბაზის მოწყობას გეგმავს. იუწყება გამოცემა Wall Street Journal-ი ამერიკის დაზვერვის საიდუმლო მონაცემებზე დაყრდნობით.

გამოცემის ინფორმაციით, ამ განზრახვის სისრულეში მოყვანის შემდეგ, ჩინეთს ატლანტის ოკეანეში პირველი სამხედრო-საზღვაო ბაზა ექნება.

როგორც Wall Street Journal-ი იუწყება, ამ ინფორმაციამ დიდი შეშფოთება გამოიწვია თეთრ სახლსა და პენტაგონში.

ოქტომბერში, პრეზიდენტ ბაიდენის მრჩევლის მოადგილე ეროვნული უსაფრთხოების საკითხებში ჯობ ფეინერი ეკვატორულ გვინეას ეწვია, რათა ქვეყნის პრეზიდენტი თეოდორო ობიანგ ნგემა მბასოგო დაერწმუნებინა იმაში, რომ უარეყო ჩინეთის წინადადება.

"ჩვენ ნათლად ვუთხარით ეკვატორულ გვინეას, რომ გარკვეული პოტენციური ნაბიჯები, მათ შორის ჩინეთის აქტივობა, შეშფოთებას გამოიწვევს ეროვნული უსაფრთხოების თვალსაზრისით", - ციტირებს გამოცემა აშშ-ის ადმინისტრაციის ოფიციალური პირის სიტყვებს, რომლის ვინაობაც არ საჯაროვდება.

თეთრ სახლში მომუშავე ერთ-ერთი წყაროს თქმით, ჩინეთი ალბათ ეკვატორულ გვინეაში საზღვაო პორტით და უდიდეს ქალაქ ბატათია დაინტერესებული - აქ, გვინეის ყურეში უკვე არის ღრმაწყლოვანი კომერციული პორტი, რომელიც ჩინეთის დაფინანსებით აშენდა.

ჩინეთის ეკვატორული გვინეით დაინტერესებას ამერიკის დაზვერვა ჯერ კიდევ 2019 წლიდან აპყრობდა ყურადღებას.

Wall Street Journal-ი იხსენებს, რომ ჩინეთმა 2017 წელს თავისი პირველი საზღვარგარეთული სამხედრო წარმომადგენლობა აფრიკის კონტინენტზე ჯიბუტიში განათავსა, სადაც ასევე მდებარეობს აშშ-ის ერთ-ერთი უდიდესი სამხედრო ბაზა Camp Lemonnier, რომელზეც 4 500 ამერიკელი სამხედო იმყოფება.

გარდა ამისა, ჩინეთის სახელმწიფო კომპანიებმა ბოლო 20 წლის განმავლობაში აფრიკის კონტინენტზე 100 კომერციული პორტი ააშენეს, რაც კიდევ უფრო ცხადჰყოფს პეკინის მზარდ ინტერესს აფრიკის მიმართ.

ამასთან, აშშ-ის თავდაცვის დეპარტამენტი ვარაუდობს, რომ ჩინეთი განიხილავს სამხედრო ბაზების მშენებლობის პერსპექტივას კენიაში, ტანზანიაში, ანგოლასა და სეიშელის კუნძულებზე.