რატი ბრეგაძე ფარისეველია, რადგან ჩვენ ვნახეთ, როგორ ძალითა და მოტყუებით გადაიყვანეს გლდანის გულაგში სააკაშვილი, - აცხადებს ოპოზიციონერი პოლიტიკოსი გიგი უგულავა. მისი განმარტებით, ოპოზიციამ აიღო ვალდებულება, რომ არანაირი აქცია არ იქნება იმ საავადმყოფოსთან, სადაც მიხელ სააკაშვილს გადაიყვანენ.
"ჩვენთვის პრინციპულად მნიშვნელოვანია ადამიანების სიცოცხლის გადარჩენა, მიხეილ სააკაშვილისა და ელენე ხოშტარიას სიცოცხლის გადარჩენა, რომ ავიცილოთ პერსონალური, ეროვნული და ისტორიული ტრაგედია. რაც შეეხება გორის ჰოსპიტალს, ჩვენ, აქ მყოფი ადამიანები ამას ვერ გადავწყვეტთ და არ დავემსგავსებით კობახიძესა და ივანიშვილს, რომლებიც ექიმების მაგივრად საუბრობდნენ მთელი ამ ხნის მანძილზე. ჩვენ ხომ ვნახეთ, რომ ერთი ექიმიც არ გამოვიდა, რომელმაც თქვა, რომ იქ კარგია, უნდა გადაიყვანოთო, 2-3 კვირაა, ამას ვისმენთ. ამიტომ ეს საკითხი გადაწყვიტონ ექიმებმა. რატი ბრეგაძე ფარისეველია, რადგან ჩვენ ვნახეთ, როგორ ძალითა და მოტყუებით გადაიყვანეს გლდანის გულაგში სააკაშვილი და ახლა ეუბნება, რომ შეთავაზებაა, მაგრამ დავანებოთ ახლა ამ დეტალს თავი. ჩვენ ავიღეთ ვალდებულება, რომ არანაირი აქცია არ იქნება იმ საავადმყოფოსთან, სადაც გადაიყვანენ და ჩვენ ამ ვალდებულებას შევასრულებთ. რაც ვთქვით, იმას შევასრულებთ. რა თქმა უნდა, ბრძოლა გაგრძელდება მიხეილ სააკაშვილის სრულ გათავისუფლებამდე, რიგგარეშე არჩევნებისთვის, მაგრამ რაც ვთქვით, აუცილებლად შევასრულებთ“, – განაცხადა გიგი უგულავამ.
