უკრაინის სახალხო დამცველის ლიუდმილა დენისოვას განცხადებით, მიხეილ სააკაშვილის უფლებების დარღვევის გამო, საერთაშორისო ორგანოზაციებს მიმართა.
როგორც დენისოვა სოციალურ ქსელში გავრცელებულ განცხადებაში იუწყება, მან უკვე მიმართა ადამიანის უფლებათა საკითხებში გაეროს უმაღლეს კომისარ მიშელ ბაჩელეტს, ევროსაბჭოს ადამიანის უფლებათა კომისარ დუნია მიატოვიჩს, ეუთოს თავმჯდომარეს ენ ლინდეს, გაეროსა და ევროსაბჭოს წამების პრევენციის კომიტეტებს, უკრაინაში მოქმედ საერთაშორისო უფლებადამცველი ორგანიზაციის წარმომადგენლობებსა და 78 საელჩოს.
"უკრაინის მოქალაქის, მიხეილ სააკაშვილის უფლებების დარღვევების შესახებ ინფორმაცია მივაწოდე ადამიანის უფლებების დაცვის საკითხში გაეროს უმაღლეს კომისარს, ეუთო/ოდირის ხელმძღვანელს, ევროპის საბჭოს ადამიანის უფლებათა კომისარს, გაეროს წამების საწინააღმდეგო კომიტეტს, ასევე ადამიანის უფლებათა დამცველ 9 საერთაშორისო ორგანიზაციასა და უკრაინაში აკრედიტებულ 78 დიპლომატიურ მისიას.
ვიმედოვნებ, რომ საერთაშორისო თანამეგობრობის მხრიდან ყურადღების გამახვილება მიხეილ სააკაშვილის უფლებების დარღვევაზე უზრუნველყოფს მისი სიცოცხლის უფლებას, უსაფრთხოებას, შესაბამის სამედიცინო დახმარებას და სამართლიანი სასამართლოს უფლებას", - წერს ლიუდმილა დენისოვა.
უკრაინის სახალხო დამცველი ლიუდმილა დენისოვა საქართველოში ვიზიტს აგრძელებს. გუშინ ის შეხვდა მიხეილ სააკაშვილის დედას, გიული ალასანიას. დენისოვამ შეხვედრები გამართა ასევე მის ქართველ კოლეგასთან, ნინო ლომჯარიასთან და ცენტრ "ემპათიას" ხელმძღვანელთან მარიამ ჯიშკარიანთან.
დენისოვას განზრახული ჰქონდა, მიხეილ სააკაშვილის მოსანახულებლად გლდანის მე-18 დაწესებულებაში შესულიყო, თუმცა იუსტიციის სამინისტრომ ნებართვა არ მისცა.