საქართველოს მესამე პრეზიდენტის, მიხეილ სააკაშვილის გათავისუფლების მოთხოვნით, თბილისში, თავისუფლების მოედანზე ხალხმრავალი საპროტესტო აქცია დაიწყო.
როგორც "ნაციონალური მოძრაობის" თავმჯდომარემ, ნიკა მელიამ სიტყვით გამოსვლისას განაცხადა, აქცია არ დაიშლება, ვიდრე ხელისუფლება მოპარული არჩევნებს არ დააბრუნებს და მიხეილ სააკაშვილი არ იქნება გათავისუფლებული.
მისივე განცხადებით, გლდანის ციხესთან აქციის გამართვა არ იქნება მიზანშეწონილი, რადგან ხელისუფლებას შესაძლოა, სწორედ ეს უნდოდეს.
მელიამ მოუწოდა მოქალაქეებს, რომ თავისუფლების მოედნიდან ფეხი არ მოიცვალონ და გლდანის ციხისკენ არ გაემართონ.
ნიკა მელიას განცხადებით, საპროტესტო აქციის მონაწილეები მოგვიანებით მთავრობის ადმინისტრაციის შენობასთან გაემართებიან.
თავისუფლების მოედანზე საპროტესტო აქციის გამართვა მას შემდეგ გადაწყდა, რაც ხელისუფლებისთვის მიცემული 24-საათიანი ულტიმატუმის ვადა გუშინ საღამოს ამოიწურა. ულტიმატუმი ხელისუფლებას ნიკა მელიამ წაუყენა და მიხეილ სააკაშვილის სამოქალაქო კლინიკაში გადაყვანა მოსთხოვა.
დღეს 8 ნოემბერს მიხეილ სააკაშვილი გლდანის მე-18 სამკურნალო დაწესებულებაში გადაიყვანეს. მანამდე ექსპრეზიდენტის პირადმა ექიმმა ნიკოლოზ ყიფშიძემ განაცხადა, რომ კონსილიუმმა მიხეილ სააკაშვილის სამოქალაქო კლინიკაში გადაყვანის გადაწყვეტილება მიიღო.
