უკრაინელი ჟურნალისტი დიმიტრი გორდონი საქართველოში არ შემოუშვეს. ამის შესახებ გორდონი სოციალურ ქსელში წერს.
ჟურნალისტის თქმით, თბილისის აეროპორტში, ჩამოფრენიდან ერთი საათის შემდეგ, ოფიციალურად გამოუცხადეს, რომ საქართველოში შემოსვლა აკრძალული აქვს.
გორდონის თანახმად, საქართველოში შემოსვლის აკრძალვის მიზეზი მისთვის არ უცნობებიათ.
"ერთი საათის წინ ჩამოვფრინდი თბილისში და მთელი ეს დრო ველოდებოდი შტამპს პასპორტში. ახლახან ოფიციალურად განმიცხადეს, რომ საქართველოში შემოსვლა აკრძალული მაქვს. მიზეზი არ დაუსახელებიათ. ცალსახად ვუკავშირებ ამ ფაქტს იმას, რომ უკრაინის საგარეო საქმეთა სამინისტრომ მიმართა საქართველოს საგარეო საქმეთა სამინისტროს თხოვნით, ორგანიზება გაუკეთოს ჩემს შეხვედრას მიხეილ სააკაშვილთან რუსთავის ციხეში. რაც მოხდა, საერთაშორისო სკანდალი და საქართველოს ხელისუფლების სირცხვილია", - წერს გორდონი.
გავრცელებული ინფორმაციით, ქვეყანაში ასევე არ შემოუშვეს გორდონის ცოლი ჟურნალისტი ალისა ბაცმანი, უკრაინაში მიხეილ სააკაშვილის ოფისის ხელმძღვანელსა და მისი მოადგილეს.
ოთხივე მათგანი თბილისში, გორდონის ორგანიზებულ კონფერენციაზე დასასწრებად ჩამოვიდა.
მანამდე საქართველოში არ შემოუშვეს მიხეილ სააკაშვილის უკრაინელი ადვოკატი ევგენ გრუშოვეცი.